KUCHING: Perintah Sarawak andal lebih sejuta hektar rizab kampung enggau lebih 1.6 juta hektar tasik marin di menua tu digaga mayuh agi.
Premier Sarawak, Datuk Patinggi Tan Sri Abang Johari Tun Openg madah, Sarawak deka ngembuan sistem palan ti dijaga pemadu besai di Malaysia ti diketegori ba baruh Taman Negara, Rizab Rampa Menua enggau Santuari Jelu Siga.
Ku iya, ba taun 1990-an bisi dua pekara pemadu beguna udah nyadi ba inisiatif Sarawak nyaga rampa menua iya nya misyen International Tropical Timber Organization (ITTO) dikena ngelala penyampau batang balak ulih diambi ba nengeri tu kelimpah nyaga rampa menua ungkup timpuh panjai.
Pekara kedua, ku iya, dikumbai Langgur Besai ungkup Jelu Siga ba Sarawak ti ngujung ke langgur nya nyadi pemungkal ngagai pengawa nyeruri tikas Ordinan Perlindungan Hidupan Liar 1998 sereta Ordinan Taman Negara enggau Rizab Alam Semulajadi.
“Rambau nya, Sarawak semina ngembuan kurang ari 15 palan dijaga baka 10 buah Taman Negara enggau tiga buah Taman Jelu Siga (urung 300,000 hektar).
“Kenyau 25 taun ti udah, palan ti dijaga ba darat enggau landskap marin udah ngerembai ngagai lebih ari 2.1 juta hektar,” ku iya.
Teks jaku Abang Johari nya dibacha Sapit Menteri Pemansang Mengeri Enggau Pengeraja Asal, Datuk Len Talif Salleh rambau Gempuru Begulai Gerempung Primatologi Antarabangsa – Gerempung Primatologi Malaysia 2023 (IPS-MPS 23) ba Palan Aum Borneo Kuching (BCCK) ditu, tadi.
Ku iya, sekeda perambu mega udah dibantai dikena nyelinting jeman ke mua rampa menua di Sarawak baka numbuh mayuh agi taman negara, rizab kampung enggau palan nyaga jelu siga.
“Diatu kami ngembuan 67 palan dijaga ba darat enggau ba tasik, palan ti dilindung ba darat diatu bisi 870,000 hektar (lebih 1,000 lipat besai agi ari menua Singapore) lalu taman marin lebih 1.2 juta hektar.
“Kitai deka ngembuan lebih ari sejuta hektar palan rizab ba darat ba baruh Sitak Dijaga Penuh (TPA) ke alai pemadu baru kami deka ngadu Simpanan Alam Bukit Siol di Kuching,” ku iya.






