KUCHING: Sarawak patut nyerungkai teknologi baru ti ulih ngurangka pemalat empas penusah, kelebih agi infrastruktur jai ti ngasuh rugi manggai beratus juta ringgit.

Sapit Premier Sarawak, Datuk Amar Douglas Uggah Embas madah, nya mega dikena nentuka infrastruktur baka jalai alun, bengunan enggau ke bukai tan ari dipangka penusah baka bah.

“Bah besai ti nuntung Sarawak empai lama udah ngenyaika infrastruktur mensia mayuh, jalai alun, tebiang enggau tanah tusur ngeraya nya nyadi.

“Nya alai kitai patut ngiga teknologi baru dikena mutarka penanggul tu laban empas bah diatu chukup besai,” ku iya.

Menteri Pekara Wang enggau Ekonomi Baru Kedua ti mega Sapit Presiden I Parti Pesaka Bumiputera Bersatu (PBB) nya bejaku munyi nya ba randau khas di opis iya di Wisma Bapa ditu, tadi.

Uggah nyemetak madah ke raban sida udah ngasuh Opis Kereja Raya (JKR) bejalaika tungkap silik ngambi nyerenih pematut ngaga jalai alun baru, kelebih agi di kandang menua ulu.

“Aku udah minta JKR ngaga tungkap kepenudi pasal penyampau agih belanja ti diguna dikena ngaga jalai alun nyentuk ke sitak menua ulu,” terang iya.