Sarawak deka bisi stesyen TV kediri

MIRI: Sarawak deka ngembuan stesyen televisyen (TV) kediri ujung taun tu diberi nama TV Sarawak.

Kepala Menteri Datuk Patinggi Abang Johari Tun Openg madah, TV Sarawak deka dipejalai Sarawak Media Group (SMG), sebuah ejensi GLC Sarawak.

Ku Abang Johari, stesyen televisyen tu deka nyendiaka servis penabur ngatika diri, pengeluar program online enggau servis penyedia berita.

“Kami seruran ingatka pangku pengawa besai industri kreatif dikena nyungkak ekonomi.

“Ngarapka ujung taun tu, TV Sarawak deka ngepunka pengawa teknikal laban nengeri udah diberi lisin 10 taun ari Opis Menteri Multimedia enggau komunikasyen ngaduka stesyen televisyen ba Kuching,” terang iya.

Abang Johari mansutka jaku nya lebuh ngintu Hari Sarawak berambaika jaku ‘Sarawak Cemerlang’ di sebuah hotel tebilang ditu malam tadi.

Sama datai Tuai Pemegai Menua (TYT) Tun Pehin Sri Abdul Taib Mahmud enggau bini iya, Toh Puan Raghad Kurdi Taib, Sapit Kepala Menteri Datuk Amar Douglas Uggah Embas, Tan Sri Datuk Amar James Jemut Masing enggau Datuk Amar Awang Tengah Ali Hassan, Menteri Perengka Pengangkut ti mega Menteri bempu tanggungpengawa ngintu Hari Sarawak 2020 Datuk Lee Kim Shin sereta menteri kabinet nengeri ke bukai.

Abang Johari madah, penumbuh TV Sarawak nyadi pelasar pengemeran industri kreatif ba menua tu mandang enggau ngerembaika buah runding sida.

Nya alai, iya meransang semua pemain industri kreatif menua ngerebut peluang tu pengudah TV Sarawak beoperasyen ila.

Suara Sarawak