Sarawak dikeandal nyadi menua maju bepenatai pemisi tinggi 2030

MIRI: Kepala Menteri Datuk Patinggi Abang Johari Tun Openg andal Sarawak majak maju enggau bepenatai pemisi tinggi manggai taun 2030.

Iya madah, ngena agih belanja RM20 bilion dalam dua taun tu, ekonomi menua deka ditambah enggau agih belanja besai ungkup belanja menua.

“Pekara tu tentu deka nambahka aktiviti ekonomi ti deka meri pangka ba pemansang ekonomi,” ku iya.
Abang Johari mansutka jaku nya lebuh ngintu Hari Sarawak berambaika jaku ‘Sarawak Cemerlang’ di sebuah hotel tebilang ditu malam Hari Tiga tu tadi.

Pia mega, Abang Johari madah, kitai deka bisi belanja RM61 bilion agi ba timpuh lima ngagai 10 taun ke deka datai enti pengawa beranakka puku ba menua luar diperunding dalam ekonomi menua.

“Sarawak ulih mansang 6 ngagai 8 peratus ninting taun manggai taun 2030 enti ngempung puku dalam ekonomi menua kitai taja pandemik Covid-19 tu nyadi penekul.

“Tang, ari sukut pekara positif, penekul ketegal pandemik nya udah meri peluang nempa dagang baru ngagai mensia mayuh kelimpah ngerumban pemansang ekonomi digital,” ku iya.

Kepala Menteri mega madahka Perintah udah numbuhka Kaunsil Pengatur Ekonomi Sarawak (SEAC) ngambi beratika polisi, strategi enggau langgur pemansang ngambika Sarawak ngubah ekonomi ke meruan agi pengelama lima ngagai 10 taun ke deka datai.

“Tu mih juluk kami enggau jalai maju sereta nyapai Sarawak Nyulut,” ku Abang Johari.

HARI SARAWAK…Abang Jo begulai enggau Tun Taib sereta bala bukai ngitauka tambai Sarawak rambau Pengerami Hari Sarawak di Miri kena malam Hari Tiga tu tadi.-Gambar Ramidi Subari.

Suara Sarawak