KUCHING: Perintah Sarawak enggau Indonesia udah selubang penemu nanggam kerejasama nyerungkai pengulih ke bisi ba menua tu.
Nya kebuah, Duta Besai Republik Indonesia ke Malaysia, Hermono madah, kerejasama tu dikeandal ulih meri pemaik ekonomi meruan ngagai kededua menua.
Ku iya, pengulih ke bisi chukup besai lalu Sarawak enggau Indonesia ulih sama negapka pemansang ekonomi nengah kerejasama begulai.
“Kitai meda Sarawak enggau Kalimantan tu bisi pengulih besai, tu nyengkaum pemansut kuasa, pemakai lalu pemadu beguna ti udah disetuju Premier Sarawak nya dagang karbon,” terang iya.
Hermono mansutka jaku nya pengudah ngatur penemuai basa ngagai Premier Sarawak, Datuk Patinggi Tan Sri Abang Johari Tun Openg, ditu tadi.
Ngelansa silik ku Hermono, Sarawak enggau Indonesia deka bekunsi penemu enggau peneleba ba pengawa ngena pengeraja asal.
Nya alai, iya nerima manah kerejasama tu lalu ngarapka kerejasama majak rat entara kededua menua.






