KUCHING: Taun 2026 chukup besai reti ba Perintah Sarawak nuju kandang menua maju 2030, enggau perati ngagai ekonomi besai empas sereta pemansang infrastruktur dudi hari.
Premier Sarawak, Datuk Patinggi Tan Sri Abang Johari Tun Openg nerang, taun tu mega mai pengarap baru ngagai operasyen AirBorneo, ti deka nambah rentayan penyambung langit sereta ngeranchak dagang temuai, dagang enggau mobiliti rayat.
Taja pia, iya nyemetak madah, penyerakup rayat Sarawak tetap nyadi pugu penegap nengeri tu.
“Pemansang tau diadu ngena teknologi enggau puku, tang penegap sarawak kebendar datai ari rayat ti seati,” ku iya ba pesan khas, ditu kemari.
Abang Johari mega meri terima kasih ngagai bala tuai enggau semua rayat Sarawak ti udah bekerejasama sepanjai taun tu begulai mai pemansang.
Iya ngarap ke semangat nya terus dikemeran ba taun 2026 enggau pengandal ati ti agi bepuguka rayat Sarawak kelebih agi pemansang sosioekonomi ti mai pengelantang ngagai rayat.
“Aku meransang semua rayat, nadai ngira bansa enggau jalai pengarap, terus ngintu pengelantang enggau penyerakup ti nyadi tiang pemun pengering Sarawak,” ku iya madah baru. — EDISI UKAS
