KUCHING: Sarawak diatu benung merambu numbuhka makmal meresa kediri empu dikena meri pemaik bejalaika pengawa meresa papillomavirus mensia (HPV).
Menteri Pemansang Indu, Ruang Bilik enggau Pengelantang Komuniti, Datuk Seri Nancy Shukri madah, pekara nya ketegal semua pengawa meresa HPV sebedau tu meseti dianjung ke Semenanjung Malaysia ngambi dipansik ba makmal.
Pekara nya, ku iya, ngujung ke kos berubat betambah enggau laun bulih pemutus ari pengawa meresa nya.
“Sebuah begunan ba Kuching udah dikelala dikena numbuhka palan tu.
“Kami udah meli begunan tu dikena numbuhka makmal meresa ba Kuching. Diatu kami benung chakah ngiga belanja dikena nyendia perengka enggau mesin ti diguna.
“Nya alai, kami ngarap bulih sukung ari perintah nengeri laban kami begunaka belanja RM15 juta dikena numbuhka makmal tu,” ku iya.
Nancy mansutka jaku nya ba aum pemberita pengudah ngelanchar Kimpin Meresa Riman Serviks KASIH Ruang Bilik: Sarawak ba Wisma SABATI ditu, kemari.
Iya bela ngemerat pemesai guna sukung ari perintah nengeri enggau Opis Menteri Pengerai Mensia Mayuh, Pengawa Berumah enggau Perintah Lokal.
“Kami deka bekerejasama laban Sarawak endang begunaka palan berubat kediri empu.
“Lebuh kitai bisi palan beperesa kediri empu, kitai ulih ngurangka ungkus tambah enggau penanggul timpuh nganjung sampel peresa tu ngagai endur bukai,” terang iya.
