KUCHING: Sarawak Metro Sdn Bhd (Sarawak Metro) nyelinting bekerejasama enggau institusyen pelajar tinggi enggau Palan Pelajar Teknikal enggau Latih Vokasional (TVET) dikena nyukung ekosistem perengka pengangkut mensia mayuh di Sarawak nengah kuasa gadung enggau teknologi moden.
Ku Sapit Direktor Projek Sarawak Metro ungkup Projek Sistem Pengangkut Mengeri Kuching (KUTS), Prabu Ganesh, kerejasama tu deka meri perati ngagai pengawa bekunsi penemu enggau teknologi dikena negapka agi penau bejalaika projek KUTS.
“Sarawak Metro naka ulih ngansah penau nengah pengelandik khas ti diguna ungkup pejalai operasyen enggau ngemanah projek KUTS,” ku iya lebuh Randau Program Hidrogen & Tech Safari 4.0.
Nengah pekara tu, Sarawak Metro bejalaika program Pemansang Nyungkak Sosio-Ekonomi (SEED).
Nya dikena ngangkatka pemanah projek KUTS nengah pengawa nempa pengereja pengawa ti landik agi enggau mungkal rentayan bekal menua dikena nyukung operasyen projek.
Program SEED tu dipun ari Program Kerejasama Industri (ICP) ti udah dikerembai ungkup projek besai ti dipelanja Perintah Besai di Semenanjung Malaysia.
Sebagi ari inisiatif ti beguna endar nengah Program SEED iya nya numbuhka kilang masang entukar hidrogen Transit Aliran Autonomi (ART).
“Nengah kerejasama rat enggau institusyen pelajar tinggi enggau Palan TVET, kitai nyelinting nentuka ART bekuasa tinggi enggau bas ulih disukung pemekuh industri enggau manah,” ku Prabu.
Nangkan nya, Hidrogen & Tech Safari 4.0 diatur Palan Penyulut Teknologi Sarawak (CENTEXS) udah digulu lebih 500 nembiak ari 10 buah sekula sekondari di selampur Miri.






