Sarawak nagih semaya perintah besai

“Ba bulan nyin kemari (Julai), aku mayar RM350 juta ngagai Perintah Besai ketegal ti kiruhka pekara sekula enggau pemaik bala anak kitai.”

LUNDU: Sarawak nagih agih belanja RM350 juta ke disemaya Perintah Besai dikena mutarka isu sekula repuk di negeri tu.

Kepala Menteri Datuk Patinggi Abang Johari Tun Openg madah Sarawak udah mayar penyampau (RM350 juta) munyika ke dipinta Perintah Besai.

Berindik enggau nya, Abang Johari ngansak Perintah Besai nguna duit nya ba pengawa ngemanah sekula repuk di negeri tu enggau lengkas.

“Ba bulan nyin kemari (Julai), aku mayar RM350 juta ngagai Perintah Besai ketegal ti kiruhka pekara sekula enggau pemaik bala anak kitai.

RANDAU…Abang Johari (kiba) bejaku ba Sesi Town Hall Berambeh Ngan Abang Johari di Balai Mensia Mayuh di Lundu.

“Tang nyentuk ngagai diatu, kereja ngemanah sekula repuk di Sarawak lalu bedau digaga.

“Maya kitai nanya Menteri Pekara Wang, Lim Guan Eng, saut iya madah deka numbuhka komiti dulu. Bebula,”ku Abang Johari.

Iya mansutka jaku nya ba Sesi Town Hall Berambeh Ngan Abang Johari di Balai Mensia Mayuh Lundu ditu, kemari.

Perintah Sarawak mayar RM350 juta ari penyampau RM1 bilion utang negeri ngagai Perintah Besai ngambi tau dikena mutarka isu sekula repuk di negeri tu.

Rikut mandangka bisi 1,020 sekula di selampur Sarawak ba dalam rintai sekula repuk alai ari penyampau nya, 415 iti sekula dalam rintai ke pemadu repuk.

Abang Johari nambah, Sarawak bisi utang enggau Perintah Besai ketegal duit jali nya sigi hak nengeri ba dalam konstitusyen.

“Perintah Besai meseti meri geran enggau duit jali ngagai negeri nitihka konstitusyen, lalu nitihka undang-undang,’ku iya.

Abang Johari madah Sarawak seruran mayar utang nitihka timpuh ke udah ditetap tetiap bulan.

Bela datai Kaban Parlimen(MP) Santubong Dato Sri Wan Junaidi Tuanku Jaafar, MP Petra Jaya Dato Sri Fadillah Yusuf, Kaban Kunsil Negeri(Adun) Tanjung Datu Datuk Amar Jamilah Anu enggau Adun Demak Laut Dr Hazland Abang Hipni.