KUCHING: Sarawak ngerikod prospek pemadu manah laban ulih ngasilka 1.7 juta metrik tan minyak sawit mata ungkup timpuh Januari nyentuk June taun tu.
Premier Sarawak Datuk Patinggi Tan Sri Abang Johari Tun Openg madahka nya napi tambah penyampau dua peratus ari timpuh ti sama ba taun 2022.
Ku iya ba taun 2022, Sarawak nyadi entara pengeluar minyak sawit pemadu besai dalam menua iya nya urung 4 juta metrik tan.
“Data nya nyereminka tambah ti besai penyampau 2.5 peratus ari taun sebedau nya (2021).
“Nya alai, industri minyak sawit udah nyadi tulang belakang ngagai sektor betanam betupi di Malaysia lalu terus ngempu tanggungpengawa besai ngagai pemansang ekonomi kitai kelebih agi di Sarawak,” ku iya.
Abang Johari bejaku munyi nya rambau Bejadika Gempuru enggau Pemandang Tinjau Rega Minyak Sawit enggau Lauric Malaysia Timur 2023 ba sebuah hotel ditu kemari.
Ku iya, industri minyak sawit udah nyadi pemansut ti pemadu besai dalam Pemansut Asil Dalam Menua (GDP) Sarawak iya nya 68 peratus ba sektor betanam betupi taun 2021.






