KUCHING: Sarawak meri sukung ngagai pengawa ngerembaika projek Trans-Borneo Railway ngerenchah adan menua ti mungkur kandang menua Kalimantan, Indonesia ti nyadi pengawa strategik negap kaul ekonomi, dagang enggau mobiliti serantau di selampur Borneo.
Pekara nya dikunsi Konsul Jenderal Republik Indonesia di Kuching, Dr Abdullah Zulkifli ba aum media pengudah ngatur penemuai basa ngagai Premier Sarawak, Datuk Patinggi Tan Sri Abang Johari Tun Openg di Kompleks Satria Pertiwi, ditu, kemari.
Ku iya, inisiatif nya ulih nambah tikas konektiviti entara Sarawak enggau Kalimantan lalu negapka rentayan dagang dua menua enti nyadi nyata.
“Ngena peluang randau tadi, Premier Sarawak minta siti rentayan konektiviti iya nya Trans-Borneo Railway dikerembai ngagai kandang menua Kalimantan.
“Nya alai, tu siti peluang ti manah dikena meransang kerejasama entara Kalimantan enggau Sarawak ngagai selampur Borneo ngambi nyadi siti genturung pemansang ekonomi enggau dagang ti nguntungka semua raban,” ku iya.
Ke penemu mayuh, nya penemuai basa keterubah Dr Abdullah ngagai Abang Johari pengudah mangku pengawa bulan Oktober taun nyin tadi.
Iya madah baru, konektiviti nambah kelebih agi ari Indonesia ke Sarawak entara batang pekara diberi iya perati laban Kuching deka nyadi tuai rumah bejadi Lumba SEA.
“Sekumbang ditu, aku deka meri perati ngagai nambah aspek konektiviti sereta kerejasama nyengkaum mega konektiviti entara rayat ke alai diatu, kaul entara Kuching enggau Pontianak udah bisi lalu Kuching nyadi kandang menua pemadu semak enggau Kalimantan.
“Kitai semua nemu taun 2027, pengerami bejadi Lumba SEA deka diatur di Kuching, ke alai disadang penyampau pengusung ari Indonesia ke Sarawak deka nambah laban datai meda pengerami nya.
“Ba taun nyin tadi, iya nya 2025, lebuh kami baru datai, Lumba Borneo udah belabuh, seraya taun 2027, Lumba Borneo deka diatur di Kalimantan Timur,” terang iya. – EDISI UKAS
