KUCHING: Sarawak deka nyulut dudi hari laban nyelinting inisiatif kuasa gadung enggau ulih dikena baru.

Premier Datuk Patinggi Tan Sri Abang Johari Tun Openg madah, kuasa karan engka kurang dikena maya ngaga hidrogen, lalu nya deka ngurangka kos ngaga ila.

“Dikena ngaga 1 kilogram (kg) hidrogen, kitai begunaka 60 kilowatt-jam (kWj) kuasa karan lalu pansik dipejalaika Perintah Sarawak enggau Petroliam Nasional Berhad (PETRONAS) tetemuka teknologi membran baru, ke semina ngena kuasa 38kWj dikena ngaga 1kg hidrogen.

“Ba minggu nyin tadi, aku bisi macham dalam jurnal ke alai sida semina ngena 15kWj ngaga 1kg hidrogen. Enti nya nyadi, pengawa mansutka hidrogen deka mudah agi.

“Enti nya mudah, engka bala sainstis tau ngaga elektroliser padat ke tau ngasuh mudah agi, nya alai pengawa ngaga hidrogen mega deka mudah agi,” terang iya.

Abang Johari bejaku munyi nya lebuh Pengerami Makai Lemai Ninting Taun Institut Injinir Malaysia (IEM) Pampang Sarawak ba Hotel Imperial ditu kemari.

Iya ti mega Menteri Pengeraja Asal enggau Pemansang Mengeri madah, kelimpah ari ngaul diri ba pengawa hidrogen gadung, nengeri tu mega deka mansutka ammonia enggau metanol gadung.