KUCHING: Sarawak terus negap penuduk nyadi palan beranak puku strategik lebuh Longi madah ke komitmen nempa kandang menua tu nyadi hab inovasyen serantau kuasa gadung.
Presiden Longi, Li Zhenguo madah, penemuai iya ke Sarawak dikena negap komitmen timpuh panjai serikat nya ngagai tikas pengulih kandang menua tu.
“Kami diatu benung tama renggat ngalih sereta muka peluang baru operasyen di Malaysia.
“Pekara ti diberi perati kami ukai semina nyadi hap pemansut aja tang nyadi palan inovasyen serantau,” ku iya.
Zhenguo mansutka jaku nya rambau aum pemberita pengudah ngatur penemuai basa ngagai Premier Sarawak, Datuk Patinggi Tan Sri Abang Johari Tun Openg di Kompleks Satria Pertiwi ditu, sehari tu.
Tampung iya, Longi udah beoperasyen di Kuching nyau deka 10 taun ti ngembuan 12 kilang besai enggau pengereja pengawa kala manggai lebih 6,000 iku.
“Berengkah ari siti kilang ti mit, diatu kami majak ngerembai berindik ari penegap atur pengawa nengeri enggau pengeransing pengereja pengawa lokal gawa,” ku iya.
