Sarawak patut terus nyingkang sejalai enggau Kepala Menteri

Bala ketuai PSB naka ulih ngemansangka nengeri tu nyadi nengeri maju ba semua sukut

ENGKILILI: Presiden Parti Sarawak Bersatu (PSB) madah Sarawak patut terus nyingkang segulai sejalai enggau Kepala Menteri Datuk Patinggi Abang Johari Tun Openg.

Kenu ku iya, bala ketuai PSB naka ulih ngemansangka nengeri tu nyadi nengeri maju ba semua sukut.

“Seriris enggau lambang matahari ke ngemenuhka kar Sarawak baka mih juluk, pengandal enggau visyen kami deka nyura dunya politik Sarawak ba jeman baru ke lebih nyulut,” ku iya.

Iya madah munyi nya, rambau bejadika program ‘roadshow’ PSB mungkur lima zon iya nya Zon Balai Ringin, Bukit Begunan, Sri Aman, Batang Ai enggau Engkilili ba Balai Raya Dr Johnical Rayong Ngipa, Skim Skrang ditu, kemari.

JAKU LALAU : Dato Sri Wong Soon Koh benung meri jaku lalau beserimbai enggau program ‘roadshow’ PSB ba Balai Raya Dr Johnical Rayong Ngipa, Skim Skrang ditu, kemari.

Menteri Dagang Entarabansa enggau E-Dagang nya madah laban ke nyadi parti pupu bansa di Sarawak, kitai enggai bisi rayat kena tinggal ari ngasaika buah merdeka ke disepi ngelama tu.

“PSB deka bejalaika tanggungpengawa meri input ngagai perintah ba pengawa ngemanahka agi perengka guna ke pemaik enggau pengelantang rayat,” ku iya.

Tandu iya, PSB besemaya terus angkun ngagai Abang Johari lebih agi dalam negika hak Sarawak ungkup pemansang dalam ngubah pemansang menua pesisir.

“Laban ke nyadi sebuah parti ke ada ari penemu rayat pupu bansa…kami nyendiaka ketuai ke bisi tanggungpengawa ke guna rayat Sarawak,” ku iya.

“Seriris enggau lambang matahari ke ngemenuhka kar Sarawak baka mih juluk, pengandal enggau visyen kami deka nyura dunya politik Sarawak ba jeman baru ke lebih nyulut.”

Tandu Soon Koh, PSB deka neruska tanggungpengawa bepelasarka konsep adil enggau hak sebaka dikena ngetanka pengelikun Sarawak.

Ku iya, PSB ngelaluka semua anak Sarawak ke ngembuan juluk ke sebaka sereta semangat beserakup bela begempung dalam parti awakka ngatur pemansang penuh.

Berebak enggau nya, Dr Rayong ke bejaku dulu ari nya ngelaluka lebih 6,000 penyukung ari lima zon Sri Aman.

“Kitai meri terima kasih ngagai Tuhan laban serak tu taja parti agi baru tang timbal ari mensia mayuh ke datai chukup meransang, pengerami serak tu chukup sekut laban penyukung,” ku iya.

KELAI BASA : Presiden PSB Dato Sri Wong Soon Koh begulai enggau ketuai PSB ke bukai ngematak tanda singa dikena ngelaluka penatai sida ba pengerami nya.

Tandu iya,kitai ngarap sukung ke baka tu ulih dipandangka nengah peti undi sereta pengawa ngerejista nyadi kaban parti ba semua sitak ke deka endur PSB bediri.

“Pesan aku, bai sereta kerembaika parti tu awakka terus tegap ba nengeri tu enti ukai kitai sapa agi deka ngetanka hak-hak Sarawak,” ku iya.

Sama bisi datai Sapit Presiden PSB ke mega Menteri Muda Perengka Pengangkut Datuk Jerip Susil, ex-Kaban Parlimen Selangau Datuk Joseph Entulu Belaun, Kaban Parlimen Sri Aman Datuk Masir Kujat, enggau ex-Kaban Parlimen Lubok Antu Datjuk William Nyalau Badak.

Sama datai ADUN Opar Datuk Ranum Mina, Sekeretari Besai PSB George Lo, ex-Pemangku Presiden TERAS Banyi Beriak, ex-Penyanding Penemu Indu PRS Ngemah Susan Clement Ingun, ex-ADUN Marudi Datuk Sylvester Entri Muran enggau bala temuai ke bukai.

DEDAT : Balar Raya Dr Johnical Rayong Ngipa ba Skim Skrang dedat laban penatai bala penyukung PSB ari lima zon mungkur Zon Balai Ringin, Bukit Begunan, Sri Aman, Batang Ai enggau Engkilili .