KUCHING: Sarawak sedia ngemansangka ekonomi hidrogen nengah Aum Besai enggau Eksibisyen Hidrogen Gadung Asia Pasifik 2023 (APGH), ti deka diatur ari 11 ngagai 13 June ba Palan Aum Borneo Kuching.
Disadang matak 100 penyereta, 500 pengari enggau 4,000 pengusung dagang, Sapit Menteri Kuasa enggau Pemeruan Rampa Menua, Dr. Hazland Abang Hipni madahka Sarawak nagit nyadi pemungkal ekonomi hidrogen gadung ba rantau Asia Pasifik.
“Kami keran enggau sedia ngalih ngagai kuasa nya datai ba taun 2030 lalu nya kebuah, Sarawak nagit ngalih ngagai hidrogen gadung dikena nagang ubah klimet enggau pemeruan rampa menua,” ku iya ba aum pemberita di DUN Sarawak, tadi.
Ku Hazland, Sarawak ngembuan mayuh pemansut ulih dikemaru, modal mensia enggau pemansang teknologi ngambi kitai mujur ngalih ngagai kuasa nya.
“Kitai mega chakah ngemansangka pemansang infrastruktur, pelajar enggau ngansah pengelandik.
“Tambah mega, Hab Petrokimia Sarawak enggau Penyangkai Kapal moden deka nyukung agenda Kuasa Gadung,” terang iya.
Iya nyemetak madah, Sarawak bisi pengulih nyungkak Ekonomi Hidrogen di rantau Asia Pasifik lalu nyadi menua keterubah ngemansangka ekonomi hidrogen gadung.






