Sarawak sehari tu nadai kes baru Covid-19

KUCHING: Sarawak mengkang nadai ngerikod kes baru positif Covid-19, ditu kemari.

Nitihka penerang ari Opis Penyangga Penusah Ngenyit Nengeri (JPBN), semua kes positif Covid-19 ba Sarawak naka kemari mengkang 552 kes.

“Bisi dua kes baru udah suman enggau pansut ari Sepital Besai Sarawak (HUS) diripotka kemari,” ku iya.

JPBN mega madah, bisi 501 iku tauka 90.76 peratus semua kes positif Covid-19 ti udah suman enggau udah pansut ari sepital.

“Bisi 12 kes baru Pesakit Dipelaba Kena Rampit (PUI) diripot enggau 27 kes agi nganti pemutus makmal.

“Nambahka nya, 339 chunto udah diambi ba Belawai, Tanjung Manis kemari ke alai 91 ari nya ditemu negatif enggau 248 agi nganti pemutus makmal,” terang iya.

Ba lansa bekaul, piak JPBN madahka bisi 5,598 peminta pejalai entara pelilih udah diterima ari 28 buah Indu Opis Pelilih Polis DiRaja Malaysia (PDRM) ba selampur Sarawak ngujungka 88,359 peminta nama tadi.

“Ari penyampau nya, bisi 80,461 udah dikemendar seraya 7,896 ditulak,” ku iya.

Iya mega madah, bisi 17 iku ditangkap laban ngelanggar Atur Tagang Pejalai Besyarat (PKPB), ditu tadi.

“Berindik ari nya, bisi 19 iku udah dikompaun laban nguji bejalai ngagai pelilih bukai nadai permit polis.

“Pekara tu ngujungka bisi 147 iku udah dikompaun kenyau ari 19 Mei tu tadi,” ku iya nerang.

Nitihka penerang ari Raban Penyaga Orang Periman (APM), bisi 447 Orang Agi Dipatau (PUS) udah rejsiter ba hotel ngambi ngurung diri ngujungka naka kemari bisi 854 PUS ba 38 buah hotel.

Kelimpah ari nya, 12,225 PUS udah abis timpuh ngurung diri nitihka penerang naka pukul 8 pagi tadi.