SARIKEI: Sarawak tetap nyukung sebarang ubah undang-undang ngambi pulaika hak nengeri nitih dipadah dalam Sempekat Malaysia 1963 (MA63) Kepala Menteri, Datuk Patinggi Abang Johari Tun Abang Openg madahka, Perintah Sarawak deka nyukung sebarang pekara ti meri pemaik tang enda nyukung lebuh pekara nya enda meri pemaik ngagai nengeri enggau rayat.

“Aku ngarap enggau penerang tu, nadai tuduh ngumbai Perintah Nengeri enda nyukung ubah nya.
“Taja pia, aku deka madah taja kitai udah ngemendarka pengawa ngubah Pekara 1(2) secara prinsip tang nadai pemendar diberi senentang enggau ubah nya naka diatu.

“Kebuah pia, komiti tu enda kala berandau isi ke amat senentang ubah nya” ku iya ba aum pemberita pengudah Pengawa Nasih Tanah Jematan Batang Rajang enggau Jalai Raya ari Sungai Pasi, Sarikei ngagai Jalai Sibu-Tanjung Manis, sehari tu.

Iya madah, lebuh aum Komiti Pemandu keterubah randau enggau pemutus nya patut ba dalam parameter Konstitusyen Perintah Besai enggau Sempekat MA63.

Kelimpah ari nya ku iya, sebarang pemutus senentang isu ti penting baka nya begunaka mandat ari Komiti Perunding ti ditumbuh Kaunsil Nengeri Sarawak.

NAMA BERITA?…Kepala Menteri betabi enggau mensia mayuh ti ngelaluka penatai iya bejadika Pengawa Nasih Tanah Jematan Batang Rajang enggau Jalai Raya ari Sungai Pasi, Sarikei ngagai Jalai Sibu-Tanjung Manis, kemari.

“Kitai nyukung ubah ba Pekara 1(2) enggau atur ubah ngagai Pekara 160 (2) senentang reti ‘Konstitusyen’.

Kebuah pia kami ngasaika ubah ngagai Pekara 1(2) tu aja, enda penuh meri pengeransing rayat Sarawak lebuh ngaga ubah ba Pekara 160(2), siti pangka ba Sempekat Malaysia 1963 patut digaga dalam Konstitusyen Perintah Besai.

Konstitusyen Perintah Besai ke diatu enda bepelasarka Sempekat Malaysia 1963.

“Aum Teknikal-Teknikal keterubah ngaga pemutus nadai ubah mimit-mimit deka digaga ba Konstitusyen Perintah Besai.

“Endang udah dikemendarka ubah penuh deka digaga lebuh proses nya tembu lalu dipansik baru pejalai MA63. Tuju iya nya ubah tu dibantaika lebuh sidang Parlimen ketiga deka diatur kena ka Oktober 2019” ku iya.

Iya mega madahka penemu Perintah Nengeri senentang ubah tunggal ba Pekara 1(2) enda ulih dijuluk kelimpah nyereta ubah substantive lain, entara lain, ubah ngagai Pekara 160(2).

Pia mega ku iya, Sarawak ngasaika ubah nya lebih engkeman enti dibantaika sepengudah pemutus substantif udah digaga senentang isu-isu ti dirandau Komiti MA63.

“ Lebuh perambu dikena ngubah Pekara 1(2) dibantaika Kepala Menteri Sabah lebuh Aum Komiti Stereo Keterubah ba MA63 iya nya Sarawak angkat nyukung prinsip ubah nya.

“Lebuh perambu nya dibai ngagai Aum Komiti Teknikal Keterubah kena ka 14 Januari 2019, pengari ti ngaga Sarawak udah diasuh aku mantaika penemu tulis.

“Penemu tu madahka kami nyukung ubah ba Pekara 1(2) enggau atur ubah ngagai Pekara 160(2) senentang reti ‘Konstitusyen’. Kebuah pia, kitai ngasaika ubah ngagai Pekara 160(2), siti pangka ngagai Sempekat Malaysia 1963 patut digaga dalam Konstitusyen Perintah Besai” ku iya.

Suara Sarawak