SRI AMAN: Perintah Sarawak majak negapka kaul kerejasama dikena mantu rayat ke napi penanggul nadai dokumen pengelala diri.
Kaban Kunsil Nengeri (ADUN) Bukit Begunan, Datuk Mong Dagang madah, ejensi bekaul, Serakup Tuai Komuniti enggau Tuai Raban Bansa (KMKK) enggau bala tuai menua, kelebih agi ba sitak Kunsil Nengeri (DUN) Bukit Begunan meseti bekerejasama.
Ku iya, kerejasama nya begunа endar nentuka rayat diembing nitih pematut maya minta dokumen pengelala diri nengah chara ke betul.
“Kerejasama rat entara ejensi perintah, KMKK enggau tuai menua beguna endar dikena mutarka penanggul tu laban rayat patut diembing chara minta dokumen pengelala diri ngеna chara ke betul.
“Enti udah bisi dokumen pengelala diri tu, rayat deka bulih akses ngagai mayuh bantu perintah lalu tu meri pengelantang rama enggau pemansang komuniti ba menua sida,” ku iya.
Mong nibarka jaku nya ba mua mayuh rambau Program Tuai Enggau Rayat ba Pengawa Nyua Dokumen Pengelala Diri ngagai 12 penerima diatur Serakup KMKK Bukit Begunan di Rumah Ramping, Klauh Dau, ditu, empai lama.
Berebak enggau nya, iya ngelalau rayat ti bisi minta dokumen pengelala diri ngambi meri kerejasama ngagai ejensi perintah enggau bala tuai menua dikena mantu ngerumban pengawa nya.
Ku iya, enti sida puntan meri kerejasama tau ngasuh sida tusah bulih bantu pengelantang, pelajar enggau ngisi pengawa puang.
“Nya alai, aku ngarapka rayat ke empai bisi dokumen pengelala diri jampat ngulihka servis sanding penemu ari KMKK sereta ejensi bekaul ngambi penanggul tu ulih diputar enggau jampat sereta nemban,” ku iya.
Ba pengawa nya, Mong bela ngemendarka agih belanja RM150,000 nengah Program Transformasyen Menua Pesisir (RTP) DUN Bukit Begunan dikena ngaduka perengkaguna di Rumah Unggi, Klauh Tinting.
Iya mega ngemendarka agih belanja RM15,000 nengah Projek Mit Pemansang Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) Rumah Ramping, Klauh Dau sereta RM5,000 ngagai gerempung indu organisasyen nya.
Sama datai, Penulung Direktor Unit Pengelikun engkau Penerit Adat Sarawak (UKPS), Dr Petrus Basik; Chairman Kaunsil Pelilih Sri Aman, Kaunsilor Anthony Abell Chendan; Tuai Pengerejister Opis Pengerejister Bansa Bagi Menua Sri Aman, Eric Douglas sereta Temenggong Leonard Libau Abol.-EDISI UKAS
