KUCHING: Gempung Parti Sarawak (GPS) deka terus bekerejasama enggau Perintah Penyerakup ngemansangka Malaysia, ku Premier Sarawak Datuk Patinggi Tan Sri Abang Johari Tun Openg.
Ku iya, taja GPS ngemeratka Sarawak bepelasar Konstitusyen Malaysia, Sempekat Malaysia 1963 (MA63) enggau Ripot Komiti Entara Perintah (IGC) tang gempung nya mega deka ke perintah ti tegap ba renggat nasional.
“Kami ngelempaika pengandal ngagai Menteri Besai, Datuk Seri Anwar Ibrahim ngemansangka Malaysia ngambi kitai bisi sebuah perintah ti tegap ba renggat nasional,” ku iya.
Abang Johari mansutka jaku nya ba Konvensyen Nasional Perintah Penyerakup ba Palan Dagang Dunya Putra (PWTC), Kuala Lumpur, ditu kemari.
Abang Johari ke mega Chairman GPS nyemetak madah, juluk GPS nya numbuhka sebuah perintah besai ti tegap ungkup pemansang menua.
“Kami di Sarawak deka ke sebuah perintah ti betatika pengawa nyagu nama Malaysia ba dunya.
“Nya kebuah, GPS nitih gerah Agong numbuhka Perintah Penyerakup,” terang iya.
Kelimpah ari nya, iya madahka ekonomi Malaysia meseti dikemaru lalu ngalih sereta ngemansangka ekonomi baharu.
Terang iya, Malaysia meseti nyingkang ngagai ekonomi meruan, ngena kuasa ulih dikemaru sereta dikemansang rayat menua tu.
