KUCHING: Opis Menteri Pelajar Malaysia (KPM) patut meri perati berat bekaul enggau isu sebana bala pengajar sentang gerah gawa ba luar bidang pengawa sida.
Presiden Serakup Pengajar Bumiputera Sarawak (KGBS) Zulkiflee Sebli madah, enda ulih dikeengai bisi sekeda pengajar ngasaika diri ngesan penbgawa ke chukup berat laban nyau ngereja pengawa nyadi kerani.
“Semaya deka nyendiaka pemantu pengajar agi bedau dipejalai nyentuk ke sehari tu, lalu pekara nya mega ngujungka pengawa pengajar majak nambah.
“Bala pengajar nya majak lenyau pengerindu ngajar ditambau enggau mayuh isu bekaul sereta pengelantang sida nadai dijaga…nyadi enda iran ati meda mayuh pengajar minta pinchin tumu ketegal kusut runding gawa,” ku iya madah ngagai Suara Sarawak.
Nya alai, dikena mutarka penanggul nya iya minta KPM patut lebih chakah netapka polisi baru sida.
“KPM patut ngatur randau begulai enggau bala pengajar nyentuk renggat baru. Pengajar orang ke ngereja pengawa ngemujurka polisi ke udah digaga KPM.
“Bala pengajar lebih nemu penanggul ke ditapi sida ndalam bejalaika pengawa nya ila. Anang semina ngaul raban Opis Pelajar Nengeri (JPN) aja laban semina ngarah aja.
“Sebana ari pengajar tebal agi deka dipejalai, ambika chuntu Beratika Bilik Kelas (PBD), maya tu sida mayuh teguran ketegal peminta enggau gerah ari Prinsipal, Kepala Pengajar (PGB),” ku iya.
Taja pia, iya madah KGBS ngarapka bala pengajar deka terus rindu ngajar anak bansa.
“Kitai nemu mayuh raban sida teguran sekumbang atur mindah betagang (PKP) suba. Nengah PdPR enggau bemacham aktiviti digaga chara online, bala pengajar chukup tusut runding.
“Nya alai, PdPR sebedau tu endang siti penelela ke chukup besai reti ngagai sida taja pemar ditapi sekumbang timpuh nya chukup berat,” ku iya.
Beserimbai enggau Hari Pengajar, iya ngarika raban KHBS deka meri Selamat Hari pengajar nuju semua pengajar ba Sarawak lebih agi bala kaban KGBS.
“Berambaika jaku ‘Guru, Tunjang Sekolah Sejahtera, dikearapka bala pengajar kitai deka terus bebendarngajar anak bansa. Dikena ngelantangka sekula, bala pengajar patut seruran nyingkang ke mua dalam mantu kerani sekula ngemansangka sekula.
“Seruran jaga pengerai ngambika kitai terus meruan gerai sampai ke pinchin,” ku iya.
