Sebelas taun nganti

Projek Jalai Perpat dirumban

SARATOK: Projek nyeleti Jalai Perpat deka digaga ngena belanja ari Opis Menteri Pemansang Menua Pesisir (KPLB), ku Kaban Parlimen Saratok Ali Biju.

Ku iya, perambau tu deka dibantai ngagai opis menteri nya udah tu lalu dipelaba nerima pemendar enggau jampat laban jalai tu beguna amat ungkup pengelantang peranak dia.

“Aku nemu, lebih 11 taun kita ditu udah nganti jalai tu diseleti nyadi jalai ti meruan ngambika bala kita lantang mindah bebaika asil utai tanam baka sawit.

“Aku andal amat Perintah Besai nengah KPLB deka berundingka pekara tu lalu ngagihka kitai belanja enda lama agi,” ku Ali.

NGELALU… Penatai Ali disambut bala mayuh.

Iya mansutka jaku tu lebuh bejadika Lumba Padang Sekula-Sekula Dipilih diatur Sekula Primari (SK) Perpat, Kabong ditu, pagi kemari.

Pia mega ku iya, jalai ti belubang enggau enda sebela ulih diseleti berenggat bekenaka belanja ari Palan Servis Komuniti Saratok, tang pengawa nyeleti kesemua jalai begunaka belanja besai amat.

“Kitai ulih ngena belanja ari palan servis, nyeleti siti dua lubang ti ngeruga pengelikun mensia mayuh, nganchau kerangan dulu ngantika belanja bisi dikena melakin jalai.

“Aku mega bisi meda kerangan enggau batu ditugung ba sekeda endur sepanjai Jalai Perpat tadi, nya kebuah aku andal amat pengawa tu ulih dirumban,” ku Ali seraya nambah, baka selama projek deka digaga nengah pengawa beripai.

Berebak enggau nya, Ali ngemendarka agih belanja penyampau RM15,000 ngagai sekula enggau RM10,000 ungkup JKKK sebedau tu ti disemaya apin dikeamat laban bisi penanggul bekaul enggau MPKK.

PENGINGAT… Ali nerima tepa ari Kepala Pengajar SK Perpat, Misis Aris.

“Belanja ungkup JKKK deka datai ari belanja bukai, ukai ari MPKK baka ti diperambu sebedau tu ketegal sekeda isu ti nyadi ba renggat Perintah Besai enggau Perintah Sarawak.

“Pia mega peminta bukai deka diperunding nitihka pematut laban agi tubah genturung pendiau apin nerima belanja pemansang lalu kitai deka beduaka belanja nya bela penyampau ngambika sama ampit ngasaika buah pemansang ari Perintah Besai,” ku Ali nandu.

Ngelansa pasal lumba sehari nya, ke alai SK Perpat bulih gelar champion, SK Beting Maro lumur dua lalu penuduk ketiga dipenggi SK Empelam.

Sama datai ngambat penatai Ali iya nya Kepala Pengajar SK Perpat Misis Aris, Chairman PIBG Pandi Abidin, bala pengajar sereta bala bukai.

BEJADI… Ali ngelepaska bala nembiak belanda.

 

TABI PUJI… Ali ngerasukka midul ngagai bala pemenang.

Suara Sarawak