SIBU: Sebuah stor ba ringkat dua ba sebuah begunan komersial ba Jalai Wong Soon Kai ditu angus lengis ba penusah angus ti nyadi malam tadi.

Tuai Balai Bomba enggau Penyah Penusah (BBP) Malaysia Zon Sibu, PgKB1 Andy Alie madah, raban sida nerima kangau ngenyit bekaul penusah nya urung pukul 10.31 malam.

“Udah nya, bisi semilan raban bomba ari BBP Sibu Sentral digerah ngesah palan penusah tu.

“Api ti nganguska stor tu mujur ditagang 18 minit pengudah nya sebedau dipadam penuh pukul 11.30 malam,” ku iya ba sebengkah penerang tadi.

Andy madah, pengawa madam api nya bela dibantu 11 raban ari BBP Sungai Merah.

Ku iya, nadai orang diripot bebadi nyawa tauka bakal ba tubuh berebak ari penusah nya.