SARATOK: Sepenyampau 170 kutak ai irup butul udah disadung ngagai sebuah mesejit enggau lima buah surau ditu.
Sapit Menteri Pengeluar Kuasa enggau Pengeraja Asal ke mega Kaban Parlimen Saratok Datuk Ali Biju madah, pemeri nya diberi nyerumba bulan berekat bala menyadi ke megai pengarap Islam.
Ku iya, pemeri nya ungkup pengelantang mensia mayuh ke datai besembiang ngagai mesejit enggau surau nya sekumbang bulan Ramadan ti udah manggai hari 15 sehari tu.
“Udah nyadi tanggung pengawa aku, meri utai diguna kita ngambi lantang agi bejalaika pengawa ba mesejit enggau surau.
“Pemeri baka tu kelai pengasih enggau penyiru ngagai bala kita sekumbang ke puasa pengelama sebulan,” ku iya.
Jaku Ali nya dikenataika pengari iya, staf Palan Servis Komuniti Sitak Parlimen Saratok lebuh ngagihka pemeri nya ngagai bala penerima, apin lama ke udah.
Ke penerang, Masjid al-Muhtadin Saratok nerima 50 kutak ai irup butul seraya Surau Darul Iman Kampung Melango Baru, Surau Cahaya Islam Kampung Melango Lama, Surau Silaturahim Kampung Masjid, Surau Darul Taqwa Kampung Tanjung enggau Surau Darul Muafiqin bela ampit 20 kutak.
