KUCHING: Sarawak Metro Sdn Bhd benung ngemansangka Sistem Ngatur Nagang Penyalah Makai Suap (ABM) sereta dilanggur diaku ba pun taun 2024.
Chairman Kaunsil Pemansang Ekonomi Sarawak (SEDC), Tan Sri Datuk Amar Abdul Aziz Datuk Hussain madah, nya seraris enggau pengangkun SEDC ba pekara integriti enggau atur pengawa korporat ti manah.
Iya ti mega Chairman Sarawak Metro madah, serikat nya chakah bejalaika inisiatif nya laban integriti beguna amat mantu pemansang begulai enggau pengelantang serikat.
“SEDC pengudah bulih setipikit Sistem ABM enggau ngelanchar Mansik Empas Makai Suap (CRA), kami terus ngemanahka agi atur pengawa anak serikat kami.
“Pia mega, SEDC bela mantaika anugerah integriti baru seraris enggau aspirasyen Perintah Besai enggau Perintah Sarawak ba pengawa ngemanahka agi Atur Pengawa Korporat ba semua renggat atur pengawa.
“Nya alai, pengawa ngaku anugerah ti engkeman deka diberi berebak ari pengawa bejalaika audit ti mungkur entiti ti nunjukka penyulut ti ngemantupka ati,” ku iya.
Abdul Aziz mansutka jaku nya rambau bejadi Hari Integriti 2023 SEDC ba Hotel Riverside Majestic ditu, kemari.
Iya madah, SEDC taun tu udah dirintai pandak nyadi lima ejensi pemadu atas ungkup Anugerah Integriti, Governans enggau Nagang Penyalah Makai Suap (AIGA) 2023 ba renggat nasional.
Nya alai, iya ngarap semua staf bekaul meri pengeransing sida ngagai integriti dikena bejalaika pangku pengawa diri.
