KUCHING: Menteri Kereja Raya, Datuk Seri Alexander Nanta Linggi ngetuai diligit Sekretariat Seminar Antarabansa ngatur penemuai basa ngagai Tuai Pemegai Menua (TYT) Nengeri Sarawak, Tun Pehin Sri Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi di Kasuma Resort, Petra Jaya.
Penemuai basa nya diatur ungkup nyua asil kerejasama sida iya nya siti bup dokumentari ti pejuluk Commemorating A Century of Kapit Peace Making (1924-2024) serimbai program ngintu 100 taun Sempekat Bebaik Kapit.
Nanta madah, bup ti ngembuan 300 lambar nya ngempuru hari besejarah, jaku, keretas kereja sereta rikod rasmi visual enggau koleksyen gambar eksklusif sepanjai pengawa ngintu 100 taun Sempekat Bebaik Kapit
. Terang iya, nya siti hari besejarah ti ngetuka laya entara komuniti di menua ulu Sarawak sereta nyadi pugu ngagai pengelikun enggau pengelantang ti diasai ke kitai kemaya hari tu.
“Ba penemuai sejam tu, Tun enggau Toh Puan bekunsi buah penemu pasal pemesai guna ngangkat sejarah Sarawak ti silik nyengkaum inisiatif numbuh kus khas di Universiti Malaysia Sarawak (UNIMAS) ngambi rebak dudi ulih mereti penatai enggau identiti sida empu.
“Kami mega bela ngelansa pasal sejarah Sarawak enggau Brunei sereta jeman dipegai Rajah James Brooke. “Aku empu berasai amat ditegu enggau penemu ti dibantai Tun enggau Toh Puan nya ti nyukung tegut insiatif kami tu.
“Ngarap bup tu ulih nyadi pesaka berega ungkup anak bansa,” ku iya. Iya meri terima kasih ngagai semua kaban secretariat, sejarawan, pemansik enggau tuai lokal ti bela ngemujur inisiatif tu.
“Sejarah ukai semina ungkup dikenang tang negap kuing kitai dudi hari,” ku Nanta nyemetak.
Bela nyempulang iya ba penemuai nya, Chairman Yayasan Tun Jugah, Tan Sri Datuk Amar Leonard Linggi Jugah, Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat, Profesor Datuk Dr Neilson Ilan Mersat, Datuk Alvin Runggah Jimbun, Dr Peter Mulok Kedit, Dr Regina Garai, Stanley Lingoh Gara, Janet Rata Noel enggau Bibiana Moteng Senang.
