SIBU: Sekeda endur di Kanowit, Song enggau Kapit balat ampuh naka pukul 2 lemai tadiberebak ari ujan bangat ti enda ngetu kenyau ari lemai kemari.
Gaya penusah nya majak raya pengudah ujan bangat enda ngetu tumu pagi tadi lalu ngujungka tikas ai ba endur ti baruh niki ngagai tiga kaki tang agi ulih dijaga.
Tuai Zom Bomba Sibu, PgKB I Andy Alie madah, endur ti balat ampuh iya nya Pasar Kanowit, Kampung Hilir, Jalai Kanowit-Durin, Jalai Kapit-Song (Menalun) enggau Jematan Poi.
Iya madah, raban bomba ari Balai Bomba enggau Penyah Penusah (BBP) Kanowit bejalaika pengawa matau tumu kenyau ari tumu pagi tadi lalu tetemu ke tikas ai ba sekeda endur manggai tiga kaki penalam.
“Taja pen ari ujan enda ngetu lalu tikas ai majak niki tang nadai sebarang kes diripot naka diatu (naka pukul 2 lemai).
“Kami deka terus bejalaika pengawa matau sereta semampai nyikap diri napi sebarang penusah ngenyit,” ku iya.
Iya ngelalau mensia mayuh kelebih agi sida ti diau ba endur baruh semampai bejimat enggau ngasika atur ari raban bekuasa.
