MIRI: Kepala Menteri Datuk Patinggi Abang Johari Tun Openg minta rayat anang alah ajum bala penyakal ti chukup pintar melit baka ular.

Ku iya, Pengawa Nyukat Tanah Adat Bansa Asal (NCR) di baruh Seksyen 6 Kanun Tanah Sarawak enggau Seksyen 18 Kanun Tanah Sarawak nyadi inisiatif perintah ngaku hak pengempu tanah NCR.

”Taja pia, bisi orang ti rindu ngajum runding orang bukai ngujungka rayat saru penemu.

“Nya kebuah lebuh orang saru penemu, sida (penyakal) ti bulih untung,” ku iya.

Iya ningkah dawa sekeda piak ti ngumbai pengawa nyukat tanah NCR di baruh Seksyen 6 Kanun Tanah Sarawak nya dikena nukar status nyadi tanah perintah.

Abang Johari mansutka jaku nya lebuh bejadika Pengawa Nyukat Tanah NCR Seksyen 18 Kanun Tanah Sarawak ba kandang menua Sungai Ukat, Bario di sebuah hotel tebilang, ditu tadi.