SERIAN: Rayat dilalau nanam sawit dikena nyungkak penatai pemisi tinggi kelebih agi raban nembiak ti bisi ati deka ngaul pengawa betanam betupi.
Kaban Kunsil Nengeri (ADUN) Bukit Begunan, Datuk Mong Dagang madah, sawit ngembuan rega makit ti manah sereta bisi pengulih besai nyadi pun penatai pemisi baru ruang bilik.
“Perintah Sarawak seruran nyukung inisiatif rayat ba pengawa betanam betupi.
“Aku ngarap mayuh agi rebak biak ngena manah peluang tu,” ku iya rambau Program Begulai enggau Komuniti Opis Pelilih Pantu ditu, kemari.
Tampung iya, Opis Betanam Betupi patut mansik enggau berati ke peminta baru ari peranak kelebih agi raban nembiak ti keran deka ngaul sektor nya.
Ngenang pasal isu tanah, iya nyemetak madah, laya entara diri menyadi nyadi penanggul besai kes bekaul tanah ba baruh Seksyen 6 enggau Seksyen 18.
“Tuai komuniti patut terang pasal adan tanah Hak Adat Bumiputera (NCR) ngambi nadai kes saru penemu tauka laya dudi hari,” ku iya.
Ba program nya, Mong meri agih belanja sepenyampau RM7,000 ngagai Komiti Pemansang enggau Pengelikun Genturung Pendiau (JKKK) Rumah Maureen, Kampung Kara Atas ungkup tuju pemansang komuniti lokal.
