SERIAN: Sekula Primari Bansa China (SJKC) Chung Hua Serian diatu bisi blok akademik baru enggau trek mit lumba beungkus RM3 juta.
Premier Sarawak, Datuk Patinggi Tan Sri Abang Johari Tun Openg madah, projek nya nyerangkung ngaga Taman Confucius enggau Taman Pengingat Liu Tzu, siku orang ti gerah jari ti udah meri taba sekula kelai ngenang jasa enggau ke pengingat.
Ku iya, blok akademik baru ti bisi empat ringkat enggau 12 bilik kelas nya siti peminta dikena nukar blok lama ti digaga ba taun 1973.
“Pengawa ngaga baru tu meri peluang ngagai kitai nyikap sekula enggau infrastruktur digital pemun dikena besikap nuju ekonomi kitai baka ti dirintai ba Sarawak Digital Economy Blueprint 2030.
“Ba inisiatif tu, raban SJKC Chung Hua Serian chukup betuah laban lebih 50 peratus ari ungkus nya belanja ari Perintah Sarawak enggau Perintah Besai.
“Tu nunjukka komitmen perintah nyukung pelajar nadai ngira penatai nyadi pugu pemansang modal mensia ti dipasuk ba Strategi Pemansang Pengudah COVID-19 (PCDS) 2030,” ku iya.
Teks jaku iya dibacha Menteri Pelajar, Inovasyen enggau Pemansang Penau, Datuk Seri Roland Sagah Wee Inn ba pengawa bejadi Blok Akademik Baru, Trek Lumba, Taman Confucius enggau Taman Pengingat Law Siu SJKC Chung Hua Serian, ensanus.
Premier Sarawak madah, pengawa bejadi blok baru nya pengawa meranak puku strategik perintah dikena nempa rebak dudi ti ukai semina pintar akademik tang mega nguasa pengelandik digital enggau teknikal ti diguna dikena nyungkak ekonomi Sarawak maju agi
. “Tiap bilik kelas ti lantang enggau trek lumba ti genap nya pengawa meranak puku terus dikena nempa rebak ti bepengerai enggau regas.
“Tu mih ruang ngansah runding nembiak nengah meransang minat nambah penemu,” ku iya
. Iya madah baru, endur belajar ti lantang nentuka sida fokus belajar seraya nambah pengasi pengawa ngajar enggau belajar.
Seraya trek lumba nya, ku iya, nyadi nalan belatih nempa disiplin, pengering runding enggau semangat beraban.
“Tu mih ti disebut pelajar ti sebela,” ku iya nyemetak.
SJKC Chung Hua Serian ditumbuh komuniti China lokal ba taun 1931 ngena semangat lurus llau bepun semina siti rumah perabung.
Sekula tu diatu mansang enggau bisi tiga blok begunan, trek lumba, siti balai sereta taman.
Sama datai ba pengerami nya, Kaban Parlimen Serian, Datuk Seri Dr Richard Riot Jaem, Presiden Gerempung Besai Kaunsil Pengatur Sekula Primari China Sarawak, Datuk Jonathan Chai Voo Tok, Residen Bagi Menua Serian, Caroline Cleophas Joseph, Chairman Pengatur Pengerami, Liew Toh Seng, Pegawai Pelajar Pelilih Serian, Bunsie Tunton enggau Kepala Pengajar SJKC Chung Hua Serian, Chung Phin Phin. — EDISI UKAS
