Semangat beripai patut dikemeran

KABONG: Mensia mayuh diperansang seruran ngemeranka semangat beripai lebih agi ba menua pesisir awak ke mayuh pengawa ulih tembu enggau lengkas.

Kaban Parlimen Saratok, Ali Biju ngambi chunto ba peranak Kampung Perpat ke beripai ngaga surau ke udah diberi nama Al-Waliyy ngena duit geran ari perintah.

“Aku meri tabi puji ngagai Komiti Surau Kampung Perpat laban udah nirika rumah sembiang tu ngena ungkus ti patut.’

“Enti ngena chara kontrak, dipelabaka aku ungkus ngaga surau nya ulih manggai ngagai RM300,000.” ku Ali rambau pejalai ngabas surau Al-Waliyy Kampung Perpat ka baru udah tembu apin lama ke udah.

Nitih ka penerang, surau Al-Waliyy digaga chara beripai ngena ungkus belanja RM80,000 lalu tembu dalam timpuh lapan bulan.

Beserimbai enggau nya, Ali bisi nambahka ungkup belanja RM20,000 dikena nyambung tali karan enggau nyeleti perengkaguna bukai ba surau nya.

Sama bela datai Ketuai Kampung Perpat Hilir Kepli Tapa, Kepala Pengajar SK Perpat Missis Aris, Tuai Rumah Tanjung Nyum enggau Ketuai Kampung Perpat Hulu Jelani Abas.

Suara Sarawak