Semilan kes baru, 14 udah suman

KUCHING: Komiti Penyangga Penusah Ngenyit Nengeri Sarawak (JPBNS) madahka bisi 14 kes udah suman enggau dikemendar pansut ari Sepital Besai Sarawak (SGH) ngujungka 777 iku tauka 83.01 peratus udah suman naka sehari tu.

Chairman iya, Datuk Amar Douglas Uggah Embas madahka Sarawak ngerikod semilan kes baru positif Covid-19 iya nya lapan ba pelilih Kuching enggau siti kes ba Miri.

Ku Uggah, kes ke-928 nya siku lelaki peranak menua baru pulai ari Negeri Sembilan enggau ditemu positif Covid-19 kena 2 November tu tadi pengudah sangkai ba Padang Bilun Entarabansa Kuching (LTAK) kena 1 November tu tadi.

Bekaul kes beperesa kontak dampih positif Covid-19, Uggah madahka bisi siti kes nya siku lelaki ti udah beperesa Covid-19 laban bisi kontak dampih enggau kes ke-900.

Lelaki tu ditemu renga enggau batuk kenyau ari 19 Oktober tu tadi tang udah gerai dua hari ke udah lalu iya mega nadai sejarah ngagai endur ke ditemu bisi kes Covid-19.

Naka diatu, bisi enam kluster agi ngerekai ba Sarawak iya nya Kluster Putra ba Bintulu sereta Kluster Green Hill, Kluster Bah Arnab, Kluster Seladah enggau Kluster Baki lalu lima kluster nya ba Kuching magang.

Suara Sarawak