KUCHING: Sarawak ngerintaika semilan pugu strategik nengah Bajet Sarawak 2027 dikena ngerumban transfomasyen ekonomi nengeri nuju ekonomi bepenatai pemisi tinggi, meruan enggau inklusif manggai taun 2030.
Premier Sarawak, Datuk Patinggi Tan Sri Abang Johari Tun Openg madah, lima juluk strategik udah ditetapka dikena nyapai selinting nya nyengkaum nambahka penatai pemisi ruang bilik, ngenegapka pengawa nyaga pengelantang rama enggau nentuka penegap fiskal nengeri tu.
“Bajet Sarawak 2027 dilanggur dikena nyungkak Sarawak nuju ekonomi bepenatai pemisi tinggi, meruan sereta inklusif manggai taun 2030 nengah lima juluk strategik,” ku iya lebuh mantaika Bajet Sarawak 2027 ba Aum Kedua Penggal Kelima, Kunsil Nengeri (DUN) Ke-19 Sarawak ditu, kemari.
Iya madahka entara juluk iya nya nambahka produktiviti ba aktiviti berega tinggi sereta nentuka pengaya dikunsi seraya negap sistem nyaga pemansang rama rama ti responsif enggau beselinting dikena nyaga pengelantang rayat. Ku iya, peneguh fiskal nengeri deka ditegap nengah pengawa ngelimat belanja, ngemaru struktur enggau ngemanah mekanisme nambah asil.
Sarawak mega bisi ati nyadi hab kuasa gadung ASEAN enggau palan dipilih meranak puku lalu ngena langkar kereja makit ubah klimet sereta rentayan rega meruan dikena nempa pun penatai pemisi baru enggau pengawa puang ba sektor gadung.
Dikena ngamatka juluk nya, Abang Johari madahka semilan pugu strategik udah dirintai, nyengkaum transformasyen enggau bemacham ekonomi, meransang pengawa meranakka puku sereta industri strategik enggau pemansang pelajar bekualiti tinggi sereta modal mensia.
Pugu bukai nyerangkung nyaga enggau pemeruan pengeraja asal, ngedut takah pemansang entara mengeri enggau menua pesisir, nyaga pun penatai pemisi rayat sereta negap pemansang budaya, lumba enggau nembiak.
Bela dikemerat iya nya pengawa bejalaika pansik, teknologi enggau inovasyen kelimpah negapka atur perintah ti nemban agi enggau peneguh fiskal.
“Semua semilan pugu strategik deka ngerumban transfomasyen ekonomi Sarawak nengah pemansang industri berega tinggi enggau bemacham sektor ekonomi ngelui sektor lama,”terang iya.
Ku iya, pugu nya deka ngerandang peluang pemansang baru ba bidang teknologi digital, kuasa ulih dikena baru enggau pengawa ngaga barang ti maju, kelimpah ari meransang pengawa meranakka puku peribit nengah inovasyen enggau kerejasama strategik.
