TATAU: Pelajar nyadi reta berega sereta ulih ngubah tikas pengidup anak tauka ruang bilik sida dudi hari.
Menteri ba Opis Premier Sarawak, Datuk Seri John Sikie Tayai madah, kebuah pia laban pelajar ulih ngubah pengidup bala anak ngambi manah agi.
Iya madah, enti bala anak kitai mujur ba pelajar, udah tentu nya deka ngubah tikas ekonomi ruang bilik sida.
Nya alai, ku iya, beguna amat apai indai negap pemanah kaul enggau bala pengajar.
“Kitai seruran meri sukung enggau peransang ngagai bala anak ngambi mujur ba pengidup lalu ba sekula bala anak deka diberi peransang enggau perais baka ba program diatur kitai tu.
“Nadai salah apai indai meri perais ngagai bala anak dikena ngaku penyulut sida,” ku iya.
Sikie mansutka jaku nya rambau Program Anugerah Pelajar Nyulut Sesyen 2023/2024 Sekula Primari (SK) Tatau ba Balai SK Tatau ditu, kemari.
Kaban Kunsil Nengeri (ADUN) Kakus nya nyemetak madah, Perintah Sarawak begunaka rebak baru ti bepenemu sereta bisi pengelandik dikena nyapai status nengeri maju enggau bepenatai pemisi tinggi manggai 2030 lalu nyelinting abis nadai penatai pemisi ruang bilik iya nya RM15,000.
“Nengah pelajar enggau pengelandik, sida deka bulih gaji besai abis nadai RM4,000 sebulan. Kitai semina bisi enam taun da agi.
“Kitai nyelinting dua tauka tiga anak mujur nyambung pelajar ba renggat degree laban sida meh deka nyadi tuai dudi hari,” ku iya.






