KUCHING: Semua opis menteri di Malaysia ngesan pangku pengawa besai mantu nagang isu sosial di menua tu.
Menteri Pemansang Indu, Ruang Bilik enggau Komuniti, Datuk Seri Nancy Shukri madah, semua opis menteri ngesan pangku pengawa kediri empu ba pengawa nagang isu sosial nya.
Iya madah, raban Komiti Komunikasyen enggau Multimedia Malaysia (MCMC) chakah mutar kes beduan siber enggau seksual ngagai nembiak mit sereta lengkas mutar isu nya.
“Polis DiRaja Malaysia (PDRM) patut bejalaika atur ngena chara sida empu ba pengawa nagang isu sosial tu.
“Nya alai, opis menteri aku bekerejasama enggau bemacham opis menteri bukai baka Opis Menteri Pengerai Malaysia (KKM),” terang iya.
Nancy mansutka jaku nya rambau aum pemberita pengudah bejadi Forum Advokasi Pelajar Pengerai Reproduktif enggau Sosial (PEKERTI) Ungkup Apai Indai Renggat Sarawak di Yayasan Sarawak ditu, kemari.
Iya madah, pengawa munas isu sosial di menua tu engka mar dikereja tang semua opis menteri di menua tu patut bekerejasama ba pengawa ngurang isu nya.
“Nya alai, kitai patut nambahka agi aktiviti bukai ti ulih nyadi aktiviti meri empas positif ngagai bala nembiak,” ku iya. – EDISI UKAS
