INDUN SILONG
Suarasarawak.news@gmail.com
KUCHING: Pengerami Hari Raya taun tu meri besai reti ngagai 120 penerima nerima baju Raya baru nengah Program Sinaran Raya.
Sapit Tuai Raban Nembiak Parti Bumiputera Bersatu (PBB) Pampang Samariang, Shaukat Khan Ishtiaq madah, program ti dipejalaika kenyau ari 10 taun ke udah, nyelinting nembiak ti begunaka bantu, raban seranta enggau anak patu balu.
“Genap taun pampang PBB Samariang deka ngulihka lima nyentuk lapan nembiak bebelika gari baru dikena nentuka sida mega ngasaika pengaga ngintu Aidilfitri.
“Taun tu kami bisi mai 120 raban nya ba Program Sinaran Raya ke alai 95 iku bebelika barang ba Mydin lalu 25 iku ti bukai, kami nganjung bantu ngagai sida nyadika kelai pengerindu.
“Genap penerima tu deka diberi bepanja penyampau RM200 siku ungkup sida meli m baju Raya baru,” ku iya lebuh dirandau pemberita ba Palan Bebeli Barang Mydin Petra Jaya, ditu, tadi.
Ku Shaukat, rega pemeri nya mega udah ditambah ari RM150 ngagai RM200 taun tu dikena nentuka penerima ulih meli mayuh agi perengka Raya ti meruan.
