SIBU: Palan Servis Parlimen Sibu deka ngatur program nyual subsidi khas ungkup 500 silinder tong gas petroleum belai (LPG) PETROS kena 23 March (Hari Minggu) tu.
Program nya dikena ngelempung tating rayat ti napi pemar ngulih LPG PETROS tauka tong gas mirah kelebih agi tong gas kuning ti agi nyadi isu besai ba pengidup besehari-sehari sida.
Kaban Parlimen Sibu, Oscar Ling Chai Yew madah, penanggul tong gas kuning apin diputar meruan ngujungka mayuh peranak bebeli ke tong gas mirah dikena nyilih tong nya lalu nya nambah tating belanja sida.
“Bepelasarka ripot ti diterima palan servis aku, mayuh peranak ditu napi pemar ngulih tong gas mirah lalu tu meransang aku ngatur program meri subsidi tu,” ku iya ditu, kemari.
Dikena mantu peranak ditu, ku iya, Palan Servis Parlimen Sibu nyendia 500 tong gas mirah ti dijual enggau rega RM25 siti.
Taja pia, iya madah, pengawa nyual nya ditatak ngagai tong gas mirah enggau gadung aja sereta enda nerima tong gas kuning.
