Sepital Kapit nerima lima buah mesin ventilator ari SSM

KAPIT: Opis Menteri Dagang Dalam Menua enggau Pekara Penguna (KPDNHEP) nyuaka lima buah mesin ventilator (High Flow Nasal Cannula) ngagai Sepital Kapit.

Semua mesin ventilator berega RM125,000 nya bantu nengah belanja zakat korporat Komiti Besai Serikat Malaysia (SSM).

Pengawa nyuaka mesin nya udah dipenyadi Kaban Parlimen Kapit ke mega Menteri KPDNHEP, Datuk Seri Alexander Nanta Linggi beserimbai enggau Program Bantu Pemakai di baruh inisiatif Pemulih ungkup sitak Parlimen Kapit, ditu kemari.

Ku Nanta, bantu mesin ventilator nya sebagi ari inisiatif SSM ngena manah belanja zakat korporat di baruh kategori fisabilillah.

“Mesin ventilator tu deka nyadi kereban sukung ungkup pesakit ti begunaka kereban kena enseput kelimpah mesin tu muntang dikena,” terang iya.

Nangkan nya, iya madahka bantu pemakai ungkup sitak Parlimen Kapit nyengkaum penerima ari ketetiga sitak Dun baka Katibas, Pelagus enggau Bukit Goram.

Ku Nanta, iya udah ngagihka belanja RM100,000 ungkup tiap sitak Dun di baruh sitak Parlimen Kapit enggau 3,000 ruang bilik deka nerima bantu nya.

Suara Sarawak