Serakup Ngasi Sarawak Temegah dibasa mantaika Gendang Pampat, Ajat

KUCHING: Serakup Ngajat Asal Iban Sarawak (Ngasi Sarawak) temegah ati dipebasa mantaika main asal beserimbai enggau Pejalai Gempuru Serakup Bansa 2019 (HiPER’19).

Pejalai program ungkup Zon Borneo (Bumi Kenyalang) deka diatur Hari Enam tu, 24 Ogos, di MYDIN Petra Jaya ditu berengkah ari pukul 7.30 pagi nyentuk 10 malam.

Presiden Ngasi Sarawak, Ajat Sumoh madahka sida berasai lantang nerima kangau mandangka main asal Ajat enggau Gendang Pampat setipak enggau rambai jaku Main Asal Enggau Seni.

Ku Ajat, program diatur Opis Pengerejista Gerempung Malaysia (ROS) Sarawak enggau Opis Menteri Dalam Menua udah ngerintai bemacham aktiviti dikena ngerichahka program sehari nyentuk nya.

“Kami dipebasa mandangka Gendang Pampat dikumbai Tempap Pepitu ba Terowong Kebudayaan urung pukul 10 pagi ditangkan Gendang Pampat digelar Tempap Lalat ba Panggau Besai ROS pukul 11.30 pagi.

ARAM SAMPAL DATAI… Poster penerang pasal Jelajah HiPER’19 Zon Borneo (Bumi Kenyalang) diatur Hari Enam tu.

“Nama tempap tu endang Tempap Asal Gendang Pampat Iban ke alai daya idup kitai bansa kenyau ari kelia sigi bepelasarka jelu kampung, indu utai enggau nama kayu sereta ke bukai.

“Bisi mega tempap Gendang Pampat enda tau dimain sebarang lalu semina tau dimain maya bisi nirika gawai besai baka Sandau Hari,” terang iya nyentuk.

Sida sebuat ti ngelar diri Tim Gendang Pampat Serakup Ngasi Sarawak bejuluk Tajai Bekumbai Ambai nyerumba lemai sabung petang, tu raban Keling Aji ngiga peruji ati sulu tuning Kumang Dayang Tatai Kelingkang.

Tim sida betubuh semilan ke alai lapan nempap ketebung lalu siku mangkung tawak seraya dua ke bukai nyadika tambah tauka nyendiaka diri enti sebarang utai nyadi maya jam kepenudi.

“Tim bejuluk Tajai Bekumbai Ambai tu diarika Tuai Sibat, aku empu, Alexander, Jarry, Roden, Lavignes, Jeremy enggau Sada ti nempap ketebung lalu Alvin deka mangkung tawak seraya Wallace enggau Darrent nyendiaka diri,” ku iya ti mega Chairman Mendam Serakup Ngasi Sarawak.

JERITA DALAM AJAT… Raban indu Serakup Ngasi Sarawak belatih Ngajat Kumang Nganjung Keling Nurun Ngayau ti deka dibantai Hari Enam tu.

Sida deka nempap gendang ti dikumbai Gendang Pampat iya nya sebengkah tabuh ti semina ngena ketebung aja lalu ketebung ti dikena manggai tujuh igi, ditempap betimbal.

Nitihka asal ku Ajat, sigi semilan iku aja nempap ketebung ba Gendang Pampat tu tauka abis nadai lima tauka tujuh iku.

“Dulu menya lebuh gendang pampat ditabuh, sida ke tuai pechayaka Orang Panggau deka nurun ngabang ke alai Gendang Pampat tu sama kategori enggau Gendang Rayah ti semina tau dikereja enti bisi piring diayan.

“Tang seruyut ubah jeman enggau pengarap, kitai besampika pengawa dikereja nadai apa nama, likun diibun Tuhan ti bekuasa,” ku Ajat nerang.

Udah nya ku iya, sida ke indu deka mantaika ajat digelar Ngajat Kumang Nganjung Keling Nurun Ngayau ke alai bisi jerita ba rentak enggau linguk ajat dibantai disempulang tabuh.

“Ngelama tu kitai suah meda ajat ngelalu temuai, ajat nikika pengabang, ajat lesung enggau ajat bebunuh, semina nyebut sekeda bansa ajat,” ku Ajat ngelansa.

NYIKAP DIRI… Tim Gendang Pampat Serakup Ngasi Sarawak bejuluk Tajai Bekumbai Ambai udah sedia merindang mensia mayuh ba Pejalai HiPER’19 taun tu.

Berebak enggau nya, iya nesau mensia mayuh bela sampal datai ngulu program diatur seraya beperindang enggau ngulihka penerang silik ari ejensi enggau opis bekaul ti bisi nyendiaka servis maya nya.

“Tu peluang enggau awak kitai begempuru, berami begulai enggau bekunsika penemu kelebih agi pasal main asal enggau seni pupu bansa.

“Kitai mega ulih negutka pemanah sintal kaul enggau pangan diri kelimpah meri sukung ngagai inisiatif piak pengatur ti udah kiruh nyendiaka pelasar ungkup kitai mantaika main asal,” ku Ajat madah nyemetak lebuh dirandau Suara Sarawak.

Ngelansa pasal Jelajah HiPER’19 diatur pagila, bemacham rintai aktiviti bisi disedia ungkup serap umur nyengkaum nembiak mit baka FunKids Corner.

Program sehari nya dipungkal enggau Zumba urung pukul 7.30 pagi ditangkan pengawa bejadika Jelajah HiPER’19 ti disadang deka dipenyadi Ketuai Direktor Opis Pengerejista Gerempung Malaysia (JPPM) urung pukul 10.30 pagi.

Pekit Karaoke #ROS_Care Got Talent deka diatur muakka lemai urung pukul 2.30, dientudika Pekit Mandangka Pekayan Tradisional (5.30 lemai) enggau Pekit Tanda Moden/Breakdance (7 malam) ti nyendiaka perais chukup manah.

Sama diatur pengawa mandang ari raban serakup gerempung main asal enggau seni sereta kaunter geran komuniti enggau #ROS_Care.

Penerang silik pasal pejalai program tau telefon nuju piak pengatur 082-454 925 tauka ngelawa website www.facebook.com/myrosswk.