Chukup semak enggau Kuching sereta mayuh tanah engkeman dikemansang
“Tang semua tu patut digaga enggau chara moden ngambika lebih bekualiti.”
SERIAN: Bagi Menua Serian ngembuan penau nyadi pemansut pemakai ngagai mengeri besai Kuching.
Tu beduduk ari bagi menua nya chukup semak enggau mengeri besai Kuching sereta ngembuan mayuh tanah engkeman dikemansang.
Sapit Kepala Menteri, Datuk Amar Douglas Uggah madah munyi nya nengah sebengkah aum enggu pengari ke dipilih Gempung Parti Sarawak (GPS), pemesai enggau staf Opis Betanam Betupi Sarawak sereta Opis Servis Veterinar Sarawak ditu kemari.
Sama bisi datai Menteri Pelajar, Pansik Sains enggau Teknologi Datuk Sri Micheal Manyin, Menteri Muda Pemansang Tanah Datuk Roland Sagah Wee Inn sereta ADUN Kedup Martin Micheal Ben.
Uggah madah, bagi menua Serian ngembuan tanggungpengawa besai nyingkang ngagai pengawa betanam betupi moden laban bisi pengelebih kediri empu.
“Kitai deka Serian nyadi pemansut pemakai ukai semina ngagai Kuching tang mega ngagai menua bukai.
“Tu meseti bejarit laban juluk Sarawak deka nyadi pengeksport pemakai besai manggai taun 2030 ke mega nyadi visyen Kepala Menteri kitai Datuk Patinggi Abang Johari Tun Openg ungkup sektor betanam betupi,” ku iya.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah, sebengkah bengkel dikena ngasilka pelin besai mansik penau penuh nyengkaum penengkeman tanah enggau utai tanam, pengawa berikan tasik dalam enggau nupi jelu enda lama agi.
“Kitai deka nemu nama utai ke dipansutka di Serian kelimpah ngiga nanas, pisang, sayur-sayur, nyengkaum nupi burung walet, kambin enggau jani.
“Tang semua tu patut digaga enggau chara moden ngambika lebih bekualiti,” ku iya.
Kenu ku iya, pengawa betanam betupi ulih mantu raban bumai bulih untung besai.
“Kiai deka meda genap ruang bilik bulih penatai pemisi manggai RM4,000 tauka lebih,” ku iya.
Pasal pengawa ngelaku ke nyadi penanggul, Uggah madah bala orang bekebun deka dibantu.
Kenu ku iya, perintah bisi serikat besai meli produk enggau nyual ngagai menua luar.
“Tang kitai meset ngembuan bekal ke chukup,” ku iya.
