SERIAN: Premier Sarawak, Datuk Patinggi Tan Sri Abang Johari Tun Openg merambu Bagi Menua Serian deka dikemansang sebaka enggau menua New Zealand manggai taun 2030.

Menteri Pekara Wang enggau Ekonomi Baru nya madah, pekara nya ulih dijapai ari penatai pemisi Sarawak ti tegap sereta perambu ngubah gaya pengidup rayat di Serian ti meruan.

“Serian bisi gunung, bukit, sungai enggau tanah ti ulih dikemansang ba sektor betanam betupi, gunung ulih endur nyimpan karbon (carbon strorage), din mega ulih nyadi palan dagang temuai.

“Nyema kita deka nyagam gaya Serian dudi hari, peda menua New Zealand,” ku iya. Abang Johari bejaku munyi nya rambau bejadi Serian Conference Centre (SCC) enggau Ngelancharka Pelin Besai Serian ba SCC ditu kemari.

Ku iya, menua New Zealand semina bisi lima juta rayat tang menua nya mujur ngemansangka menua pesisir enggau manah.

“Sida ngemansangka jalai, tasik enggau menua pesisir, sapa kala ngusung tasik Taupo di New Zealand?

“Kitai ulih ngemansangka Tasik Danu (Serian), ngambi ulih mai mayuh temuai menua luar datai kitu,” ku iya.

Iya madah, pekara nya diserah ngagai Ejensi Penyeraris Pemansang Greater Kuching (GKCDA) dulu laban agih belanja RM1.5 bilion udah diberi.

“Serian dampih enggau Kuching, infrastruktur udah bisi sereta udah dikemanah laban menua kitai bulih penatai pemisi ti tinggi.

“Nya alai, pekara ti pemadu dulu deka diadu iya nya deka ngerandang penatai pemisi baru ungkup nengeri.

“Enti suba penatai pemisi nengari semina urung RM6 bilion tang ba taun 2022 penatai pemisi menua kitai lebih RM11 bilion,” ku iya.

Iya nangkan nya madah, ba taun 2030 Pemansut Asil Dalam Menua (GDP) Serian dikeandal ulih nambah.

“Diatu GDP Serian bisi RM600 juta, kami nyelinting GDP Serian tu nambah ngagai RM1.4 bilion ba taun 2030.

“Pia mega, penatai pemisi ruang bilik di Serian dikeandal ulih nambah seraris enggau pengerembai nengeri entara enam ke lapan peratus.

“Aku pechaya pekara tu ulih dijapai ba taun 2030 lalu Serian deka nyadi menua New Zealand ti mit,” ku iya.