KUCHING: Kimpin Pengelikun Jalai Alun serimbai Pengerami Krismas 2024 diatur dikena nentuka operasyen servis bas dipejalai enggau likun sereta ngasi ke atur.
Sapit Menteri Pengangkut, Datuk Hasbi Habibollah madah, pengawa bejalaika kimpin nya nentuka bas ti bejalai ba Sarawak dibai enggau likun.
“Kitai deka beratika gaya bas, meresa tayar, brek, sistem enggau semua utai ti diguna ngambi perengka pengangkut likun dikena sebedau bekejang ngagai endur ke dituju.
“Berebak enggau nya, kami mega deka meresa deriba nya empu, baka sekali ke bisi makai dadah tauka nentuka deriba nya enda lelak maya deriba,” ku iya.
Hasbi bejaku munyi nya rambau aum pemberita pengudah ngulu Program Advokasyen Pengelikun Jalai Alun serimbai Musim Pengerami Hari Krismas 2024 di Terminal Bas Kuching Sentral ditu, malam tadi.
Ku iya, deriba nya deka dikemendar deriba bas enti semua pekara diperesa tu udah dipejalai enggau meruan.
Iya madah, slip pemendar (setipikit) deka diberi ngagai deriba ti udah diperesa ke alai deriba ti enda pas enda ulih deriba seraya bas ti dikena iya enda dikemendar mindah.
Iya bebendar madahka bas ti ngaul diri dalam pejalai jauh meseti bisi dua iku deriba ngambika sida ulih besilih sepemanjai pejalai nya.
“Enti nadai deriba kedua, sida enda dikemendarka nampung pejalai,” ku iya.
