Servis internet di Bario deka dikemanah

BARIO: Urung 14 buah genturung pendiau ngambi bagi dalam Pengerami Nukenen enggau Main Asal Kelabit Bario ke-14 ke diatur pengelama tiga hari bejurut berengkah 25 ngagai 27 Julai tu tadi.

Presiden Rurum Kelabit Sarawak Dr Philip Raja madahka pengerami tu diatur dikena ngintu enggau ngetanka main asal Kelabit enggau rampa menua nya.

“Pengerami tu ulih meri penyedar bekaul penyelai enggau pengelain pemakai raban bansa Kelabit ke semina ulih digiga ba Bario aja,” ku Philip.

Iya mansutka jaku nya rambau Bejadika Pengawa Nutup Pengerami Nukenen enggau Main Asal Kelabit Bario Ke-14  ti dipenyadi Kepala Menteri Datuk Patinggi Abang Johari Tun Openg lebuh maluk kereban main asal sida 14 kali.

Pia mega, Abang Johari bisi ngemendar peminta agih belanja ngaga enggau nyeleti jalai Long Banga ngagai Bario.

KELAI… Abang Johari malu tiang nya 14 kali nyadika kelai nutup Pengerami Nukenen enggau Main Asal Kelabit Bario Ke-14.

Nambahka nya ku iya, Perintah Sarawak deka berundingka pematut ngaga padang bilun ke baru tauka meli bilun engkabang Airbus begunaka aum enggau perambu ti silik sebedau dipejalai.

Kebuah pia, perambu tu dikena mutarka penanggul ungkus perengka pengangkut sereta penerebai bilun ti ditatak ngagai pelilih mit nya.

“Nyema pengawa ngaga padang bilun ke baru dipejalai, gaya rampa menua bebukit meri pemar kelimpah Perintah Sarawak bulih pemendar tama ngagai adan langit menua sepiak,” ku iya nambah.

Beduduk ari nya, Abang Johari mega deka ngemanah servis internet ba Bario ngambika sebaka enggau juluk Perintah Sarawak lebuh bejalaika ekonomi digital enggau nambahka sektor dagang temuai sereta industri betanam betupi ungkup rebak Kelabit enggau komuniti Bario jemah.

Abang Johari mega madahka agih belanja penyampau RM50,000
Ngagai Gerempung Rurum Kelabit Sarawak ungkup ngatur pengerami nya.

Sama datai Sapit Kepala Menteri ti nyadi Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas, Menteri Dagang Temuai, Seni, Main Asal, Nembiak enggau Lumba Sarawak Datuk Haji Abdul Karim Rahman Hamzah, Pemangku Sektretari Perintah Sarawak Datu Jaul Samion, Adun Mulu Datuk Gerawat Gala, Adun Lambir Ripin Lama, Direktor Unit Pengatur Pengawa CMO Anthonio Kahti Galis, Residen Bagi Menua Miri Haji Mastapa bin Haji Julaihi enggau Pemangku Sapit Residen Bagi Menua Miri ti nyadi Pemesai Pelilih Miri Abdul Aziz bin Haji Mohd Yusuf.

PEMAKAI ASAL KELABIT… Entara pemakai raban bansa Kelabit ti dinah ungkup bala temuai.