TUSUN KETERUBAH

MENUA Indonesia nyadi menua ti ke-15 pemadu besai dalam kar dunya iya nya ngembuan pemesai 1,904,569 kilometer (km) persegi.

Indonesia ngembuan tujuh geografis tunggal iya nya Jawa, Kalimantan, Kepulauan Maluku, Kepulauan Nusa Tenggara, Papua, Sulawesi enggau Sumatra.

Ari tujuh geografis tunggal tu, Indonesia dibagi ngagai 38 kandang menua.

Nya nyengkaum Jakarta, Jawa Barat, Kalimantan Tengah, Kalimantan Selatan, Maluku Utara, Papua Barat, Papua Pergunungan, Gorontalo, Sulawesi Tenggara, Acheh, Kepulauan Riau, Jambi, Belitung, Lampung enggau ti bukai.

Kandang wilayah Indonesia ti pemadu semak enggau Sarawak iya nya Kalimantan Barat (Kalbar) ti tebal agi diuan etnik Dayak, Melayu, Jawa, Bugis enggau Madura.

Kalbar sebagi ari kandang menua Pulau Borneo ti dipegai indu mengeri Pontianak sereta ngembuan pemesai sitak urung 146,807 (km) persegi.

PALAN BERUBAT

Bekau ari pemesai kandang menua tu, rayat Indonesia di Kalbar tebal agi milih mengeri Kuching di Sarawak nyadi palan berubat sereta ngulihka servis pengerai.

Garis adan entara menua Kalbar enggau Sarawak bisi pemanjai 2,019.5 (km), iya nya garis adan pemadu panjai di Malaysia.

Di Sarawak, palan neresa adan tu disebut Kompleks Imigresyen, Kastam, Kuarantin enggau Pengelikun (ICQS) seraya di Kalbar palan neresa adan tu disebut Pos Lintas Batas Negara (PLBN).

Lalu kededua menua tu bisi ngembuan penyambung ari tiga palan neresa adan iya nya ICQS Tebedu-PLBN Entikong, ICQS Biawak-PLBN Aruk enggau ICQS Lubok Antu-PLBN Nanga Badau.

Siti dajalai neresa adan ti benung diperambu perintah iya nya ICQS Serikin ti dipelaba deka nyungkak pemansang ekonomi enggau sukut dagang temuai kelebih agi sektor dagang temuai perubat.

Perambu ICQS Serikin tu semina penyauh empat kilometer (km) aja ari adan Malaysia-Indonesia tauka semina 21 (km) ari Pasar Bau.

Palan tu ila deka besambung enggau PLBN Jagoi Babang ti udah tembu digaga kenyau ari dua taun ti udah tang palan tu bedau ulih dikena ketegal ICQS Serikin bedau digaga.

Taja udah suah nyenguk PLBN Jagoi Babang lebuh ngambi berita menteri nemuai kia, aku empu enda kala ngindik kaki ke menua seberai.

Tang ninting maya ngusung PLBN Jagoi Babang aku suah dipadahka raban pemesai ba palan nya pasal rayat ari genturung menua Bengkayang, Seluas, Jagoi Babang, Singkawang enggau palan bukai ti seruran ngusung Kuching ketegal deka ngulihka servis berubat.

NERESA MENUA

Nya alai, ungkup tusun berita tu, aku empu bejalai neresa adan ke Indonesia nengah ICQS Biawak-PLBN Aruk ningaka sebana enggau anak runding rayat Indonesia empu ti besemak enggau adan menua kitai tu.

Bekunsi mimit pejalai aku nengah ICQS Biawak enggau PLBN Aruk, aku datai dia dalam pukul 9.00 pagi lalu terus nuju palan rejister ICQS Biawak sebedau dibai nuju PLBN Aruk.

Sebaka enggau lebuh kitai ba imigresyen padang bilun, ba PLBN Aruk semua barang ti dibai tama ke menua Indonesia deka diperesa ngena scanner, mua digambar enggau chap jari aku diambi ngena mesin khas.

Ari PLBN Aruk, kami disambut siku deriba van Pak Dedi, iya madahka diri deka nyadi deriba ti mai bala kami mindah kin kia sepemanjai diau ba Indonesia.

Palan ti keterubah digusung aku iya nya ngusung pasar mit Jagoi Babang sebuah kandang menua ti pemadu semak enggau Serikin.

Ari PLBN Aruk ngagai Jagoi Babang kami ngambi awak urung empat jam ti nengah jalai alun sempit enggau jalai bingkuk baka ular, nya ti ngasuh aku nyau asai deka engkual ketegal sebening pala digusak dalam van.

KEREBAN MODEN

Datai ba Jagoi Babang aku sempat ngerandau dua peranak dia ti mantaika sebana sereta ngembuan pengarap ti besai ngagai projek ICQS Serikin.

Ku Susi Marsi, 30, iya andalka penusah ti kala nuntung iya dalam taun siti nyin kemari enda nyadi ba orang bukai agi.

Susi ditinggalka apai iya midang ketegal penyakit riman renggat kepenudi taja pen apai iya suah berubat ba klinik di Jagoi Babang.

“Nyau berapa kali aku nganjung apai ke klinik di Jagoi Babang, penyakit apai lalu enda temu, tang sekali aja aku mai apai berubat ba sepital peribit di Kuching, penyakit apai terus ditemu lalu iya dikenuku lutur ditepan riman rekung.

“Tang lebuh nya, lutur udah nyerah alah laban penyakit riman apai aku udah balat sereta ba renggat ti kepenudi.

“Aku nadai jalai bukai, kelimpah mai apai pulai ke menua ngujungka iya midang taun siti nyin kemari,” ku iya.

Ku Susi, iya mai apai berubat ke Kuching nengah jalai PLBN Aruk-ICQS Biawak ti begunaka timpuh empat jam pejalai.

Timpuh pejalai tu pandak agi enti dibanding pejalai nuju sepital besai pemadu semak di Pontianak ti begunaka timpuh urung lapan jam.

“Aku bebayar urung RP4 juta (RM1,000) lebuh mai apai berubat ba sebuah sepital peribit di Kuching, rega nya enda entu mar ba aku laban servis pengerai sepital di Kuching chukup manah sereta bekualiti.

“Mayuh kereban moden dikena ba sepital peribit di Kuching ti nadai dikembuan ba klinik Jagoi Babang baka mesin x-ray enggau ke bukai.

“Kelimpah ari nya, servis lutur ngagai pesakit mega manah, ti ngasuh mayuh peranak ba Jagoi Babang enggau palan besemak ditu milih sepital peribit di Kuching berubat,” ku iya.

TIMPUH PEJALAI PANDAK

Nya alai, Susi ngembuan pengarap besai awak ICQS Serikin digaga enggau lengkas ngambi ulih meri pemaik ngagai rayat sida kelebih agi ba sukut nyaga pengerai.

“Nyema ICQS Serikin udah tembu digaga ila, timpuh pejalai kami berubat ke Kuching pandak agi semina urung dua jam pejalai aja laban ari Jagoi Babang ke Serikin semina 45 minit aja.

“Kami mega deka muntang agi berubat ngagai klinik peribit di Bau nyema ICQS Serikin nya udah tembu laban klinik peribit di Bau jauh moden sereta manah agi ari klinik pengerai di Jagoi Babang ditu kelimpah suah sekut.

“Nya alai, aku andal ke ICQS Serikin nya digaga lengkas ngambi pejalai pansut enggau tama rayat di kededua menua muntang sereta likun agi,” ku iya.

Pekara ti sebaka dibantai Juweng Jisau, 43, ti madah ke urung 90 peratus rayat Indonesia di Kalbar berubat ke Kuching ketegal servis berubat di menua tu manah sereta bekualiti agi.

“Peminta rayat ba Kalbar ngagai servis pengerai di Kuching chukup tinggi laban kereban berubat din manah, moden, baru sereta bekualiti agi.

“Nya ngujungka 90 peratus rayat ditu berubat kin ketegal Kuching lebih dampih kelimpah servis pengerai ti jauh manah agi.

“Kami sanggup mayar rega berubat asal kami gerai aja, ditu penkami bebayar lebuh berubat, enti ulih kami deka sekali berubat terus gerai,” ku iya.

Ku Juweng, nyema ICQS Serikin tembu ila, PLBN Jagoi Babang ulih dikena penuh sereta meri pemaik ari sukut kaul kededua menua tu.

“Kelimpah berubat, aku mega ulih ngusung menyadi aku di Bau, aku bisi dua menyadi indu di Bau ti suah digusung aku rambau pengerami Gawai Dayak.

“Kelimpah ari nya, sukut ekonomi ditu enggau din pen ngerembai laban kitai bela ulih bejalaika dagang antarabansa.

“Nya alai, aku andal ke Perintah Malaysia ngelengkaska agi pengawa ngaga ICQS Serikin dikena meri pemaik ngagai rayat di kededua menua tu,” ku iya.

Tembu ngerandau peranak di Jagoi Babang, aku bejalai ngusung PLBN Jagoi Babang empu meda sereta nyerungkai penerang silik agi pasal guna palan nya ngagai rayat di kededua menua.

Aku sempat berandau enggau pemesai ti nyaga sereta berati ke operasyen PLBN Jagoi Babang, palan nya agi sengian laban bedau mayuh orang ulih neresa PLBN Aruk.

Randau aku enggau Kepala Pengatur PLBN Jagoi Babang, Misdo Jerry deka ditusi aku ba tusun kedua.

Ari PLBN Jagoi Babang, aku neruska pejalai nuju siti kandang menua mit di Kalbar dikumbai Bengkayang.

NGELANTANG RUNDING

Munyi ti disebut aku ba pun tadi, jalai nuju Bengkayang bingkuk baka ular sereta bebukit tinggi tang peneleba ulih meda rampa menua orang nya siti peluang ngagai aku belajar sentang kaul enggau budaya menua bukai.

Pejalai nuju Bengkayang begunaka timpuh urung tiga jam, lalu tebal agi kami mansa kebun sawit bedandang besai, kebun jagung enggau umai padi tabur di sepemanjai jalai nya.

Kami bisi mansa kandang menua Seluas, siti pasar mit ti sengian sereta enda mayuh orang, pelaba aku orang enda mayuh ketegal kami datai kia hari nyau udah ngalih lemai.

Aku mega bisi mansa Tiang Pengingat Pemaik Sanggau Ledo kelai pemaik sereta sempekat badu bebunuh entara rayat Madura enggau Sambas di Kalbar.

Kelimpah ari nya, aku mega bisi mansa Rumah Bentang ti diempu Balai Adat Dayak Kabupaten Bengkayang dikena nyaga adat enggau pesaka bansa Dayak ba Kalbar.

Ngalih ke malam, aku bisi berandau enggau siku peranak asal Bengkayang iya nya Barudin S.H. siku luyar menua nya empu ti mega mediator ukai akim ke berejister di baruh Perhimpunan Advokat Indonesia (PERADI).

Kelimpah ngerandau iya pasal Rumah Bentang, aku bisi ngulihka buah runding iya bekaul projek ICQS Serikin.

Ku Barudin, peminta sereta guna servis pengerai di Sarawak chukup tinggi ngagai rayat di Jagoi Babang enggau Bengkayang.

“Terus terang aku madah, kami ditu chukup nyamai enggau servis sereta pemanah rayat di Kuching, ukai semina ba sukut pengerai tang sukut bukai baka servis hotel enggau palan makai.

“Servis pengerai di Kuching penuh sereta meruan, taja rega servis nya mar mimit tang kami pechaya nengah servis nya kami ulih gerai,” ku iya.

Iya madah kediri kala mai bini iya berubat ngagai siti sepital peribit di Kuching ti chukup ngemantupka ati.

“Lutur enggau indu misi di sepital nya chukup manah, bilik hotel endur kami duai ngenduh chukup beresi kelimpah muntang ngiga palan endur makai.

“Nya ti ngasuh aku chukup dipebasa sereta gaga laban asai ti ngusung ruang bilik diri empu,” ku iya.

Iya madah, kelimpah ari berubat, rayat ari Kalbar mega suah nguna peluang nya raun di mengeri Kuching.

“Ba Kuching mayuh palan ulih dilawa baka pasar besai, supermakit enggau palan ngelantang ati kelimpah jalai alun ti chukup likun.

“Nya alai, aku andal ke ICQS Serikin nya digaga lengkas, projek ti manah baka tu enda ibuh ditangguh kelalu lama laban nya endang ungkup pemaik rayat.

“Aku minta kasih ngagai Perintah Malaysia enggau Sarawak ngambi ngaga ICQS Serikin nya enggau lengkas laban jalai neresa adan nya ila endang deka meri mayuh penguntung ngagai kitai semua,” ku iya.

PENELEBA BEREGA

Ninga ke sebana peminta rayat menua bakih kitai tu, aku chukup temegah laban Sarawak kelebih agi Kuching nyadi palan ti ditapatka rayat Indonesia berubat.

Penemuai aku ke Jagoi Babang enggau Bengkayang ukai semina ngulihka penerang tang ngasai ke peneleba kediri empu timpuh pejalai ti chukup jauh sereta mar dilawa.

Endang patut rayat ba Kalbar ditu milih Kuching nyadi palan endur sida berubat laban jalai alun ari Serikin ke Bau lalu ari Bau ke Kuching chukup besai, manah sereta likun ditengah.

Pemun ngambi ICQS Serikin nya tembu ukai semina juluk ati rayat Sarawak aja, tang mungkur peminta ti tinggi rayat ba Kalbar berubat kitu.

Kelimpah ngerembaika sektor pengerai, dagang temuai enggau ekonomi, ICQS Serikin nya iya deka nyadi jalai tama pemadu likun rayat Indonesia ke Sarawak.