KUCHING: Raban bansa Dayak baka Iban, Bidayuh enggau Orang Ulu patut begempung sereta seati ngintu Gawai Dayak.

Sapit Kepala Menteri Tan Sri Datuk Amar Dr. James Jemut Masing madah bansa Dayak enda patut pambar ketegal bida penemu politik tauka pekara bukai.

“Aku minta, maya ngintu Gawai tu, semua bansa Dayak patut begempung enggau pangan diri.

“Gawai diintu kitai setaun sekali, lalu perintah udah ngelai Gawai Dayak nyadi hari besai ngagai semua bansa Dayak,” ku iya.

Jemut Masing ba sebengkah penerang berita pesan Gawai mega minta bansa Dayak anang besengki jaku ketegal bansa bukai ti semina deka ngeruga pemanah kaul sida.

“Kitai endang ngelaluka penatai bansa bukai sama ngintu Gawai Dayak begulai enggau kitai, richah sereta rami tang enti bansa bukai semina deka manbarka bansa kitai nya enda tau, enda disagi nyadi.

“Gerempung baka Gerempung Bansa Dayak Sarawak (SDNU), Gerempung Bansa Dayak Bidayuh (DBNA) enggau Gerempung Bansa Orang Ulu (OUNA) sereta gerempung ukai dikuasa perintah (NGO) bukai ti bekaul endang seruran diembing ngagai pengawa bansa dikena ngetanka adat asal bansa kitai,” ku iya madah nyemetak.

Kelimpah ari nya, Jemut Masing madah bansa Dayak tu endang ungkup raban bansa tu aja kelebih agi maya ngintu Gawai Dayak tu raban bansa patut begulai manah, berami sereta betulung ngambika hari besai ulih diintu enggau ati lantang.

“Aram kitai sama nanggam rat simpul kaul bansa kitai semua dalam siti komuniti Dayak sama serakup sereta teguh seati.

“Enggau awak tu aku meri Selamat Ngintu Hari Gawai Dayak, gayu guru gerai nyamai sereta nguan menua,” ku iya.