MIRI: Perintah Sarawak benung nungkap pengawa numbuhka sistem belanja ti seikas enggau menua ti udah maju ba rantau tu.
Premier Sarawak Datuk Patinggi Tan Sri Abang Johari Tun Openg madah, pengawa patut digaga enggau silik.
Kebuah pia ku iya laban pangku pengawa enggau pengelebih pinchin pengereja pengawa perintah Sarawak dikuasa Opis Pengereja Pengawa Perintah Menua.
“Taja pia, Perintah Sarawak deka terus komited bejalaika sistem belanja ti berundingka ubah jeman diatu seraya nunda menua bukai.
“Kitai endang nemu ubah tu lebih ngagai ubah ba sukut sistem belanja, elaun enggau pinchin kelebih agi ti bepanggai ngagai gaya ekonomi menua enggau kos idup diatu,” ku iya.
Teks jaku Abang Johari nya dibacha Sapit Premier Sarawa, Datuk Amar Douglas Uggah Embas rambau Program Gempuru Pengereja Pengawa Perintah Nengeri di sebuah hotel ba Miri, tadi.
Ku iya, Perintah Sarawak diatu pechaya ekonomi menua udah berengkah ngalih ngagai sukut ti positif sereta ngerembai ba sukut emolumen.






