Sitak luar Kuching bepenau dikemansang

Endur ngemansangka pengawa betanam betupi dandang besai enggau dagang temuai

KUCHING: Sitak luar Kuching ngembuan penau dikemansangka enggau pengawa betanam betupi dandang besai, ku Kepala Menteri Datuk Patinggi Abang Johari Tun Openg lebuh dirandau pemberita bekaul enggau pemansang menua pesisir Kuching.

Ku iya, ba luar kandang menua Serian enggau Kuching deka diberi fokus enggau pemansang betanam betupi dandang besai sereta dagang temuai.

“Tu diperunding sepengudah menua tu dipeda ngembuan mayuh infrastruktur.

Pengelebih ti dikembuan menua pesisir tu iya nya infrastruktur lalu semua prasyarat perengka guna udah bisi,” ku
iya.

Abang Johari mansutka jaku tu pengudah Pengerami Ngelaluka Pengabang ti diatur bala ketuai Parti Pesaka Bumiputera Bersatu (PBB) di Dewan Serakup Besai Dayak Bidayuh (DBNA) ditu, pagi tadi.

Nangkan nya, iya madah pemansang menua pesisir Kuching tu enda sebaka enggau pemansang di Kota Samarahan ba baruh Ejensi Pemansang Intergrasyen Samarahan (IRSDA) ti nyerangkum nyentuk ke menua Sebuyau.

“Pemansang pesisir menua Kuching tu semina nyerangkum Serian enggau Kuching aja.

“Tu beduduk ari Serian ti udah nyadi siti Bagi Menua, nya alai Serian ngembuan pelan pemansang kediri empu tang
disambung ngagai Kuching.

Nya kebuah kitai deka ngaga jalai alternatif luar, berengkah ari Jalai Samarahan ngagai Palan Aum Borneo Kuching
(BCCK) lalu nuju menua pesisir Kuching, ku iya.

Sama bisi datai Sapit Kepala Menteri Datuk Amar Douglas Uggah Embas, Menteri Pelajar, Sains enggau Pansik Teknologi Datuk Seri Michael Manyin Jawong, Menteri Utiliti, Menteri Utiliti Datuk Seri Dr Stephen Rundi Utom, Kaban Parlimen Kapit ti mega nyadi Sekretari Besai PBB Datuk Alexander Nanta Linggi sereta Menteri Kereja Raya ti mega nyadi Chairman Parti Keadilan Rakyat (PKR) Baru Bian.

SAMA NGABANG… Abang Johari berandau enggau Baru Bian rambau pengerami Ngelaluka Pengabang di DBNA.Gambar Ramidi Subari