Skim Bantu ungkup pesakit buah punggung

KUCHING: Opis Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit deka merambu siti Skim Bantu ti engkeman ngagai orang sakit buah punggung di Sarawak.

Menteri iya, Datuk Fatimah Abdullah madah bantu tu siti ari chara Perintah Nengeri ngurangka penusah ti ditapi rayat.

“Di Sarawak tu empu, sepenyampau 45 palan berubat haemodialisis.

“Tu nyengkaum 25 palan dipejalaika Opis Menteri Pengerai Malaysia (KKM), 11 dipejalaika opis swasta lalu semilan dipejalaika sida NGO,” ku iya.

Fatimah madah munyi nya lebuh bejaku ba aum pemberita pengudah Bengkel Langgur Meri Skim Bantu ngagai Orang Sakit Buah Pinggang di Sarawak bepalan ba siti hotel tebilang ditu, kemari.

Datuk Sri Fatimah Abdullah

Nangkan nya ku iya, sepenyampau 3,317 iku orang bisi sakit buah punggung di Sarawak lalu perengka dikena berubat di Sarawak mengkang enda chukup.

“Ba palan berubat haemodialisis, sepenyampau 314 mesin dialisis disedia ba sepital perintah.

“Ari penyampau nya, 112 iti mesin udah lebih lapan taun lalu patut diganti enggau mesin baru,” ku iya.

Fatimah madah, siti mesin semina ulih ngubat dua iku aja, lalu sida tu deka berubat tiga kali dalam seminggu sereta ungkus berubat chukup besai.

“Beduduk ari pemayuh orang ti bisi sakit punggung tu, tu nyau mejal sekeda ari sida nyau berubat di sepital swasta tauka NGO.

“Nitihka ripot ari Opis Pengerai Nengeri Sarawak (JKNS), sepenyampau 46 peratus sida ke sakit buah punggung nerima dialisis disediaka ba palan KKM,” ku iya nambah.

Kelimpah ari nya ku Fatimah, sida mega deka merambu bekaul enggau sida ke sakit tu ti bisi penanggul miskin, nasai perengka pengangkut nganjung diri berubat tauka diau ba menua pesisir.

“Semua pekara bekaul enggau penanggul sida ke bisi sakit buah punggung tu deka diperambu kami ba kabinet.

“Tepulai ngagai kabinet deka meri pemutus enggau perambu ti dipantaika kami ila,” ku iya.

Rambau Bengkel Langgur Meri Skim Bantu ngagai Orang Sakit Buah Pinggang di Sarawak, sepenyampau 28 iku orang ari selampur Sarawak dikangau enggau bengkel nya.