Skim insuran meri mayuh pemaik

KUCHING: Serikat Insuran Allianz (M) Berhad nyendiaka skim insuran nitihka pematut dikena ngintu pengelantang peranak rumah panjai.

Pos Malaysia Berhad deka mai enggau nerang pasal inisiatif kelimpah meri sanding penemu ngagai bala tuai rumah ti deka meli insurans nya.

Sapit Kepala Menteri Datuk Douglas Uggah Embas madah, tu program enggau inisiatif pemadu manah ungkup rayat kelebih agi sida ke diau di rumah panjai.

“Bayar premium ninting taun semina RM75 aja ti nyendia bayar pampas manggai RM10,000 ti mungkur penusah angus enggau penusah ngenyit bukai ti meri pemaik ngagai peranak dia.

“Skim insuran tu endang patut disedia laban kitai bela nemu penusah ngenyit ulih nyadi sebarang maya, enda ulih disadang,” ku iya nerang.

Uggah mansutka jaku tu lebuh nerima pejalai nemuai basa ari Menijar Pos Malaysia Berhad Sawai Bajing enggau Eksekutif Makit Serikat Insurans Allianz (M) Berhad Vera Phang Lee Ping sereta Dayak Response Team @ DART diketuaika Tajem Sinok ba opis iya, ditu tadi.

Pia mega ku iya, perambu nya deka diperunding ungkup sitak Bukit Saban ti bisi 94 buah rumah panjai.

Nitihka statistik ari Opis Bomba enggau Penyah Penusah nyentuk 31 Julai tu tadi, bisi 12 rumah panjai ba selampur nengeri udah dituntung penusah karam di darat.

Nambahka nya, 70 peratus kes angus bepun ari sut tali karan seraya 20 peratus ketegal pengilap lebuh berapi ngena dapur gis.

KENANG…Datuk Douglas Uggah begambar kenang begulai enggau pemesai ari serikat Insurans Allianz(M) Berhad enggau bala pemesai ari Pos Malaysia Berhad.