Soon Koh badu nyadi menteri

Ketegal basa aku bisi pekara patut dikerandau enggau iya (Kepala Menteri) laban aku tetap badu udah tu

KUCHING: Baka ti dipelaba sebedau tu Menteri Wang Kedua Datuk Sri Wong Soon Koh madah iya deka ngelengkaka penuduk ba kabinet sereta Menteri Wang Kedua Sarawak enda lama agi.

Iya ti mega Presiden Parti Sarawak Bersatu (PSB) madah sebedau badu iya meseti betemu mua enggau Kepala Menteri Datuk Patinggi Abang Johari Tun Openg dulu sebedau nyemetak madah kemaya iya badu.

“Bisi tiga pekara ti deka dikerandau aku enggau Kepala Menteri sebedau ngelengkaka penuduk tu.

“Baka ti ditemu kita diatu aku ‘kediri’ ba kabinet, nya alai dalam politik aku meseti ngembuan politik ti ‘integriti’ sebedau badu,” ku iya.

Soon Koh bejaku munyi nya ba aum pemberita ba Begunan Baitul Makmur ditu, lemai tadi.

PEKARA BELANJA…Datuk Sri Wong Soon Koh nerang ngagai pemberita pengawa ti bekaul pekara belanja ti agi digaga iya ba aum pemberita ba Begunan Baitul Makmur ditu, lemai tadi. -Gambar NADIM BOKHARI

Ku iya, tiga pekara ti ngasuh iya meseti betemu mua enggau Kepala Menteri iya nya ketegal pasal penumbuh PSB, pasal pekara wang enggau bisi ‘portfolio’ entarabansa ti begunaka randau enggau Abang Johari.

“Maya aku numbuhka parti UPP kena 11 Januari 2015 sereta nyilih parti nya ngagai PSB kena 8 Disember 2018 pengawa nya dipenyadika Kepala Menteri (Abang Johari), tang ketegal bisi bebida ba runding politik aku meseti nusi ngagai iya pejalai tauka tunga kuing PSB udah tu ke alai aku patut meri basa ngagai iya.

“Kebuah ti kedua iya nya, aku nyadi menteri wang kenyau Julai 2004 (15 taun udah lalu) nya kebuah aku endang ngemeratka pekara belanja menua nyentukka seharitu (kemari) pan aku agi megai tanggungpengawa nyadi menteri wang.

“Nyadi aku irau meda bisi jaku Sapit Kepala Menteri Tan Sri Datuk Amar Dr. James Jemut Masing ba surat kabar (Borneo Post online) ti madah perintah diatu patut ngena duit simpan menua RM31 billion nangika GPS alah maya pengawa bepilih ti deka datai.

“Aku enggai meda duit tu diayah sengapa, jaku baka nya endang nadai mereti,” ku iya.

Nangkan nya, ba kebuah ti ketiga iya madah bisi portfolio’ entarabansa bekaul enggau ‘e-dagang patut dirandau ngagai Abang Johari dulu.

Kelimpah ari nya, iya nerangka pengawa betemu mua enggau Abang Johari ukai deka ngaga peminta patut tauka enda iya badu tang deka ngerandau tiga pekara nya tadi sebedau ngundur diri.

“Kita (surat kabar) madah aku deka betemu enggau Kepala Menteri ketegal deka nanya patut tauka enda aku badu nya enda betul.

“Ketegal basa, sebedau aku nyurutka diri aku bisi pekara patut dikerandau enggau iya (Kepala Menteri) laban aku tetap badu udah tu,” ku iya.

Kenu ku iya, pemadu iya deka ditemu pengudah betemu enggau Abang Johari enda lama agi.

Lebuh ditanya sentang pemadu Mandal Presiden PSB Datuk Dr Jerip Susil iya madah enda nemu.

Pia mega, lebuh ditanya sentang tunga kuing PSB udah tu iya semina nyaut jalai tebuka luas lalu PSB nyadi parti luar tauka parti ngati kediri.

Suara Sarawak