KUCHING: Kaunsil Dagang Temuai Sarawak (STB) nampung pengawa ngerandang makit Thailand nengah pengawa ngambi bagi ba Thai International Travel Fair (TITF) Bangkok 2026.
Pemandang nya diatur belabuh ari 22 nyentuk 25 Januari 2026 ba Palan Konvensyen Antarabansa Queen Sirikit (QSNCC), ngempuru pemekuh industri dagang temuai ari rantau tu.
Tuai Pegawai Eksekutif STB, Sharzede Datuk Salleh Askor madah, Thailand nya makit ti udah nempa pengandal ngagai Sarawak.
“Penatai Sarawak ba TITF Bangkok 2026 meri perati ngagai pengawa negut kaul kerejasama dagang enggau negap pangku pengawa Sarawak nyadi Pintu Penama Malaysia Ke Borneo.
“Seraya pengawa tu ngayanka pengandal makit ngagai penyampau temuai ti nambah serimbai Taun Nemuai Ke Malaysia 2026,” ku iya.
Nangkan nya, Sarawak ti ngambi bagi ba TITF Bangkok 2026 mega nyukung inisiatif ngelaku dagang temuai menua nipak selinting Tourism Malaysia nyapai 43 juta temuai serimbai Taun Nemuai Ke Malaysia 2026.
STB ba sebengkah penerang madah, TITF Bangkok 2026 ngelai taun ketiga STB ngambi bagi ba pemandang nya pengudah ba Bangkok ba taun 2024 enggau Chiang Mai ba taun 2025.
